"Avropada Təhsil” sərgisindən əvvəl brifinq keçirilib
Avropa İttifaqının Azərbaycandakı Nümayəndəliyi dördüncü “Avropada Təhsil” sərgisinin 10-11 oktyabr tarixlərində Bakıda “Hilton” mehmanxanasında keçiriləcəyini bəyan edib.
AFN.az xəbər verir ki, bu gün bir sıra Avropa ölkələrinin səfirlərinin iştirakı ilə brifinq keçirilib. Bildirilib ki, sərgidə Avropanın 16 ölkəsini təmsil edən 60-dək universitet iştirak edəcək. Şənbə günü 10 oktyabr tarixində saat 11:00-da başlayacaq açılış mərasimində Aİ-nin Azərbaycandakı səfiri Aİ-yə Üzv dövlətlərin səfirləri ilə birgə iştirak edəcək.
“Study in Europe - Avropada Təhsil” sərgisində məqsəd gənclərə Avropada ali təhsil proqramları və təqaüd imkanları haqqında məlumat verməkdir. Sərgidə təhsil imkanları ilə yanaşı, gənclər Avropa ölkələrində tələbə həyatı barədə də faydalı məlumatlar əldə edə biləcəklər.
Avropa İttifaqının Azərbaycan Respublikasındakı səfiri Z.A. Marjiana Kujundzic bildirib ki, Avropada təhsil almaq zəruri bilik və bacarıqlar qazanmaq, yeni mədəniyyətlər kəşf etmək, dillər öyrənmək, beynəlxalq əlaqələr qurmaq və unudulmaz təcrübə qazanmaq üçün bir fürsətdir: "Ümid edirik ki, tədbirimiz gənc azərbaycanlıları Aİ-də təhsil almağa, yaradıcılıq, innovasiya, ilham və fürsət dünyasını kəşf etməyə təşviq edəcək”.
“Avropada Təhsil” sərgisi, 1996-cı ildə Aİ-Azərbaycan arasında Tərəfdaşlıq və Əməkdaşlıq Sazişinin imzalanması ilə başlayan və 30 il davam edən daha geniş və genişmiqyaslı tərəfdaşlığın bir hissəsidir. O vaxtdan bəri Aİ Azərbaycanın təhsil sektorunu 29 layihə ilə dəstəkləyib.
Brifinqdə Latviya, Litva, Belçika, Macarıstanın səfirləri və səfirlik nümayəndələri iştirak edib.
Avropada Təhsil barədə əlavə məlumat almaq və sərgiyə qeydiyyatdan keçmək üçün keçiddən istifadə etməyiniz xahiş olunur:
