ABŞ İrkutskdakı vətəndaşlarına vəba şübhəsi ilə bağlı xəbərdarlıq edib
ABŞ-ın Moskvadakı səfirliyi Rusiyanın İrkutsk vilayətində vəba şübhəsi olan şəxsin öldüyü və bəzi xəstəxanalarda karantin tədbirlərinin tətbiq edildiyi barədə xəbərlərdən sonra bölgədəki ABŞ vətəndaşlarına yerli səhiyyə orqanlarının göstərişlərinə əməl etmələri ilə bağlı çağırış edib.
AFN.az xəbər verir ki, səfirliyin yazılı açıqlamasında İrkutsk vilayətindəki səhiyyə vəziyyəti ilə bağlı mətbuatda yayılan xəbərlərin izlənildiyi bildirilib.
Açıqlamada vəba şübhəsi ilə bir şəxsin həyatını itirdiyi, İrkutskdakı bəzi xəstəxanalarda karantin tədbirlərinin tətbiq edildiyi və bəzi səhiyyə müəssisələrinin bağlandığı barədə xəbərlərin olduğu qeyd edilib.
Bölgədəki ABŞ vətəndaşlarından yerli səhiyyə orqanlarının göstərişlərinə əməl etmələri və təsirlənmiş səhiyyə müəssisələrindən uzaq durmaları istənilən açıqlamada, hərarət və ya tənəffüs yolları ilə bağlı əlamətlər müşahidə olunarsa, vaxt itirmədən tibbi yardım alınması tövsiyə edilib.
Sözügedən bölgəyə səyahət edənlərə 14 gün ərzində səhhətlərini izləmələri çağırışı edilən açıqlamada yerli mətbuatda yayılan məlumatların da izlənilməsi istənilib.
