ABŞ Arktikada hərbi iştirakını genişləndirmək üçün İslandiya ilə əməkdaşlığı artırır
ABŞ Arktikada hərbi mövcudluğunu genişləndirməyi və İslandiya ilə təhlükəsizlik sahəsində əməkdaşlığı dərinləşdirməyi planlaşdırır.
AFN.az xəbər verir ki, bu barədə “The Wall Street Journal” məlumat yayıb.
Məlumata görə, ABŞ dövlət katibi Marko Rubionun İslandiyaya səfəri zamanı Vaşinqtonun Arktikada hərbi imkanlarını artırmaq planları müzakirə olunub. Rubio İslandiyanın infrastrukturunun, texnologiyalarının və müşahidə imkanlarının ABŞ üçün strateji əhəmiyyət daşıdığını bildirib.
Qəzet yazır ki, ötən ay Qrenlandiya ilə bağlı əldə olunan razılaşma ABŞ-ın adaya nəzarət istəyini tam təmin etməsə də, bölgədə Amerika hərbi mövcudluğunun genişləndirilməsi üçün imkan yaradıb. Bu isə Qrenlandiya və Şimali Atlantikada əməliyyatlar üçün hava limanları və müşahidə infrastrukturu olan İslandiyanın strateji əhəmiyyətini daha da artırır.
Rubionun sözlərinə görə, Vaşinqton İslandiya ilə daha geniş təhlükəsizlik əməkdaşlığına açıqdır. O, ABŞ-ın İslandiyanın hava, dəniz və quru infrastrukturundan istifadə etməsinin Arktikada müşahidə və çəkindirmə imkanlarını artıracağını bildirib.
“The Wall Street Journal” qeyd edir ki, ABŞ 2006-cı ildə İslandiyadakı daimi hərbi mövcudluğunu dayandırıb. Lakin son dövrdə adanın Şimali Atlantikadakı strateji mövqeyi, xüsusilə Rusiya sualtı qayıqlarının fəaliyyətinin izlənməsi və sualtı infrastrukturun qorunması baxımından yenidən əhəmiyyət qazanıb.
Rubio İslandiyada “Keflavik” aviabazasına da baş çəkib və burada növbəli şəkildə fəaliyyət göstərən ABŞ Hərbi Dəniz Qüvvələrinin P-8A “Poseidon” patrul təyyarəsi ilə tanış olub.
