Anthropic-in əməkdaşlarının 96 faizi milyonçuya çevrilib
Claude süni intellekt modelinin yaradıcısı olan və Dario Amodeinin baş icraçı direktor vəzifəsini tutduğu Anthropic şirkətinin birjada səhmlərini satışa çıxarması gənc texnologiya şirkətinin əməkdaşlarının böyük əksəriyyətini bir gecədə milyonçu edib.
AFN.az xəbər verir ki, şirkət 19 noyabr 2026-cı ildə Nyu-Yorkdakı Nasdaq birjasında ANT kodu ilə ticarətə başlayıb və ilk ticarət gününün sonunda bazar dəyəri 1,76 trilyon dollara çatıb.
Tənzimləyici qurumlara təqdim edilən sənədlərə əsasən, bu ilin sentyabr ayına şirkətin əməkdaşlarının sayı 5300 nəfər olub.
Özəl şirkətlərin səhmlərini izləyən Hill platformasının məlumatlarına görə, Anthropic səhmlərinin ilkin kütləvi təklif qiymətini hər səhm üçün 83 dollar müəyyənləşdirdikdən sonra təxminən 600 əməkdaşın səhm portfelinin dəyəri 100 milyon dolları ötüb. Beləliklə, onlar 100 milyon dollardan çox sərvətə malik şəxslər kateqoriyasına daxil olublar.
Şirkət daxilində Qarışqalar adlandırılan əməkdaşlardan təxminən 2800-nün 10 milyon dollardan çox dəyərində səhmi var. Təxminən 5100 əməkdaşın, başqa sözlə, işçi heyətinin 96 faizinin səhm aktivlərinin dəyəri isə 1 milyon dolları ötüb.
Hill platformasının təsisçisi və baş icraçı direktoru Endryu Benson cümə axşamı CNN-ə açıqlamasında Anthropic-də işdən ayrılma səviyyəsinin çox aşağı olduğuna diqqət çəkib. O, ən təəccüblü məqamın bu prosesin nə qədər sürətlə baş verməsi olduğunu bildirib. Bensonun sözlərinə görə, Anthropic-in sürətlə yüksəldiyi artıq bir müddətdir aydın idi və əməkdaşlar bu fürsəti itirməyin nə demək olacağını bildikləri üçün şirkətdən ayrılmağa tələsmirdilər.
Adətən nağd pul ehtiyatları məhdud olan Silikon Vadisi startaplarının əməkdaşlarına maaşla yanaşı şirkət səhmləri verməsi qeyri-adi hal deyil. Gələcəkdə mümkün satınalma və ya ilkin kütləvi təklif vədi işçiləri daha səylə çalışmağa və səhmlərini pula çevirmək imkanı yarananadək şirkətdə qalmağa həvəsləndirir. Lakin çox az sayda startap Anthropic qədər böyüyə və bu sürətlə inkişaf edə bilib. 2021-ci ildə yaradılan şirkətin 2024-cü ilin sonunda əməkdaşlarının sayı 1000 nəfərdən az idi.
Bensonun sözlərinə görə, əksər texnologiya startaplarında maliyyə qazancı baxımından şirkətə erkən qoşulmaq yüksək vəzifədə olmaqdan daha vacibdir. O bildirib ki, iyerarxiyada aşağı pillələrdə yer alsanız belə, 2023 və ya 2024-cü ildə şirkətə qoşulmusunuzsa, bu ilin əvvəlində işə başlayan yüksək vəzifəli əməkdaşla müqayisədə daha çox qazanc əldə etmək ehtimalınız yüksəkdir.
Bunun əksinə olaraq, SpaceX iyun ayında böyük rezonans doğuran ilkin kütləvi təklifini həyata keçirməzdən əvvəl 20 ildən artıq müddətdə özəl şirkət kimi fəaliyyət göstərmişdi. Həmin birja əməliyyatı şirkətin 22 min nəfərlik işçi heyətindən təxminən 4400 nəfəri milyonçuya çevirmişdi.
Anthropic-in ilkin kütləvi təklifi təsisçilərdən başqa şirkət daxilindəki investorların və əməkdaşların ticarətin ilk günündə səhmlərini nağd pula çevirməsinə imkan verməsi ilə də fərqlənir. Əksər ilkin kütləvi təkliflərdə əməkdaşlar adətən üç-altı ay davam edən və bu müddətdə səhmlərini satmalarına icazə verilməyən məhdudiyyət dövrü ilə üzləşirlər.
Anthropic-in birjada listinqi isə təsisçilərdən başqa şirkət daxilindəki şəxslərə səhmlərin ticarətə başlamasından dərhal sonra paylarının 10 faizədək hissəsini nağdlaşdırmağa imkan verən mürəkkəb və mərhələli qrafiki əhatə edib. Cümə axşamı bu imkandan neçə nəfərin yararlandığı hələ məlum deyil.
Əməkdaşları Texas, Kaliforniya və Florida ştatlarına yayılan SpaceX-dən fərqli olaraq, Anthropic-in fəaliyyəti texnologiya sektorunda sərvətin sürətlə artmasının bütün iqtisadi mənzərəni dəyişdirdiyi San-Fransisko şəhərində cəmləşib. Yeni milyonçuların sayındakı kəskin artım son illərin ən sürətli bahalaşmasının qeydə alındığı San-Fransiskonun daşınmaz əmlak bazarına təzyiqi daha da artıra bilər.
Redfin daşınmaz əmlak platformasının məlumatlarına görə, şəhərdə orta qiymətli ev oktyabr ayında ötən ilin eyni dövrü ilə müqayisədə təxminən 19 faiz bahalaşaraq 1,7 milyon dollara satılıb. Milli Rieltorlar Assosiasiyasının məlumatına əsasən isə həmin dövrdə ölkə üzrə mənzillərin median qiyməti 416 min 700 dollar səviyyəsində qalaraq, demək olar ki, dəyişməyib.

