BVF Ukraynaya 1,6 milyard dollarlıq kredit ayırmağa yaxındır
Beynəlxalq Valyuta Fondu (BVF) Ukraynaya 1,6 milyard dollar məbləğində vəsaitin ayrılması ilə bağlı razılaşma istiqamətində mühüm irəliləyiş əldə olunduğunu açıqlayıb.
AFN.az xəbər verir ki, fondun Ukraynaya təqdim etdiyi kredit proqramının ikinci və üçüncü icmalları üzrə maliyyələşdirmə təminatlarının əldə olunması şərti ilə razılaşmanın imzalanması üçün əhəmiyyətli irəliləyiş qeydə alınıb.
Fondun açıqlamasında Qevin Qreyin rəhbərlik etdiyi BVF nümayəndə heyətinin Ukrayna rəsmiləri ilə 8,1 milyard dollar həcmində olan dördillik Genişləndirilmiş Maliyyələşdirmə Mexanizmi (EFF) proqramının ikinci və üçüncü icmalları ilə bağlı səmərəli müzakirələr apardığı bildirilib.
Açıqlamada qeyd olunub ki, yaxın müddətdə işçi heyəti səviyyəsində razılaşma əldə etmək məqsədilə danışıqlar virtual formatda davam etdiriləcək. Belə bir razılaşma üçün zəruri olan siyasət öhdəlikləri üzrə ortaq mövqeyə gəlmək istiqamətində mühüm irəliləyiş əldə edildiyi vurğulanıb.
Ukraynanı dəstəkləmək və müharibənin gözləniləndən daha uzun sürməsi nəticəsində yaranan əlavə maliyyə ehtiyaclarını qarşılamaq üçün maliyyələşdirmə təminatlarının əldə olunması məqsədilə beynəlxalq tərəfdaşlarla təmasların davam etdirildiyi bildirilib. BVF əməkdaşlarının proqnozuna görə, Ukraynanın maliyyə çatışmazlığı 2027-ci ildə 32-34 milyard dollar, 2028-ci ildə isə 17 milyard dollar təşkil edəcək.
Açıqlamada proqram çərçivəsində göstəricilərin birinci icmaldan sonra yaxşılaşdığı qeyd olunub və bu müsbət dinamikanın davam etdirilməsinin vacibliyi vurğulanıb.
Həmçinin mövcud göstəricilərin Ukrayna rəsmilərinin sentyabrın sonunadək bütün kəmiyyət göstəriciləri üzrə fəaliyyət meyarlarını yerinə yetirdiyini təsdiqlədiyi bildirilib.
Getdikcə çətinləşən təhlükəsizlik vəziyyəti, iqtisadi infrastruktura hücumların artması və müharibənin 2027-ci ilədək davam edəcəyi ehtimalı nəzərə alınaraq, birinci icmaldan sonra ölkənin iqtisadi perspektivlərinin aşağı istiqamətdə yenidən qiymətləndirildiyi açıqlanıb.
Fondun açıqlamasında bildirilib ki, hökumətin makroiqtisadi sabitliyi və ümumi dayanıqlılığı qorumaq səylərinə baxmayaraq, müharibənin əhali və iqtisadiyyat üzərində ağır dağıdıcı təsiri davam etdiyindən ölkənin iqtisadi perspektivləri son dərəcə qeyri-müəyyən olaraq qalır.
Nümayəndə heyətinin rəhbəri Qevin Qrey danışıqlarla bağlı açıqlamasında maliyyələşdirmə təminatlarının əldə olunmasından asılı olaraq, icmal prosesinin daha sonra BVF-nin İcraçı Direktorlar Şurasının təsdiqinə təqdim ediləcəyini bildirib. Onun sözlərinə görə, bu təsdiq Ukraynanın təxminən 1,6 milyard dollar məbləğində vəsait əldə etməsinə imkan verəcək.

