Yardım etməsək, körpə Əminə eşitmək və danışmaq şansını ömürlük itirə bilər- FOTOLAR+VİDEO
Anadangəlmə eşitmə qüsurlu olan 1 yaş 5 aylıq Əminənin koxlear implant əməliyyatı üçün 35 min manata ehtiyac var
Anadangəlmə eşitmə qüsurlu olan 1 yaş 5 aylıq Əminə Cahangir qızı Teymurova haqqında məlumat sosial şəbəkələrdə qarşımıza çıxdı. Ailə övladını bu problemdən xilas etmək üçün xeyirxah insanlardan yardım istəyirdi.
“Yeni Müsavat” olaraq bir körpəni ömürlük eşitmə qüsurundan xilas etmək üçün başlayan kompaniyaya biz də dəstək vermək qərarına gəldik və Teymurovlar ailəsinin Nizami rayonunda kirayədə qaldıqları mənzilə baş çəkdik.
Bizi qarşılayan anası Türkay Teymurova və babası Eldar Qocayev uşağın xəstəliyi haqqında məlumat verdilər.
Türkay xanım deyir ki, ilk uşaq olduğu üçün bir qədər təcrübəsiz imiş və uşağın eşitmə qüsurlu olmasının fərqinə gec varıb: “Uşağın neçə yaşından adına reaksiya verdiyini, neçə ayından sözlər deməyə başladığını bilmirdim deyə, qızımın bu problemini də gec aşkarladıq. 1 yaşı olanda hiss etdim ki, uşağı çağırıram, ancaq baxmır, yatdıqda evi tozsoranlayıram oyanmır. Sonra Respublika Diaqnostika Mərkəzinə apardıq, orada Kompüter Tomoqrafiyası ( KT) və Maqnit Rezonans Tomoqrafiya ( MRT) etdirdik, eşitmə qabiliyyətini yoxlayan BERA testi olundu.
Məlum oldu ki, hər iki qulaqda eşitmə yoxdur. Anadangəlmə daxili qulaqda problem olduğunu dedilər və təbii eşitmə qabiliyyətinin heç bir zaman bərpa olunmayacağını bildirdilər. Eşitmədiyi üçün qızımda nitq də təbii olaraq formalaşmayıb. Yalnız əməliyyat edilərək süni aparat qoyularsa, həmin siqnallar vasitəsilə eşidə bilər. Ancaq zamanımız məhduddur, nitq qabiliyyətinin bərpa olunması üçün 2 yaşına qədər bu əməliyyatı etdirməliyik, əks halda, danışığı tam bərpa olunmayacaq, kəkələmə və sair qala bilər, dili gec açıla bilər. Qızım indi 1 yaş 5 aylıqdır, 7 ay zamanımız var”.
Əminə ətrafda baş verənləri səssiz bir film kimi izləyir, yalnız hərəkətlərə reaksiya verir. Arxadan gələn insanın addım səslərini eşitmədiyi üçün qarşısında kimisə görəndə diksinir. Danışa bilmədiyindən hisslərini aqressiv hərəkətlərlə izah edir, yaxınlarını vurmağa, incitməyə çalışır. Ətrafda danışan insanlara baxıb, o da nə isə ifadə etmək üçün ağzını açsa da, qəribə səslər çıxarır, nə bir söz, nə bir hərf… Doğmalarının mimikalarını diqqətlə izləyir, onlar güləndə üzünün ifadəsi dəyişir, yanaqlarına təbəssüm qonur, anası ağladıqda isə aqressiv səslər çıxarır. Onun beyni hələ də ağ kağızdır. Əgər zamanında lazımi yardım göstərilməzsə, ömrünün sonuna kimi həyatı səssiz izləməkdə, yaşamaqda davam edəcək.
Anası Türkay Teymurova deyir ki, qızından ana kəlməsini eşitmək arzusu ilə yaşasa da, bu arzunun reallaşması uçun 35 min manat pula ehtiyac var: “Bu süni aparatın qiyməti 16 min avrodur, üstəgəl, əməliyyat və digər xərclərlə birgə 35 min manat lazımdır. Süni aparatı beyinə yerləşdirməklə iş bitmir, vaxtaşırı onun səs yüksəkliyini tənzimlənməli, iş qabiliyyəti yoxlanmalıdır. Bu, ömürlük bir aparatdır. Əgər xeyirxah insanların yardımı ilə həmin pul toplanarsa, qızım bu həyata normal bir insan kimi davam edə bilər. Onun ana kəlməsini deməsi üçün nələr verməzdim… Evimiz olsaydı, tərəddüd etmədən satardıq, yetər ki, qızım eşidə bilsin. Ancaq kirayədə yaşayırıq. Tibb Universitetinin Tədris Cərrahiyyə Korpusunda LOR cərrahi Yusif Hacıyev var. Deyir ki, qızım implant əməliyyat olunmalıdır, sonra beyninə süni aparat yerləşdiriləcək, xaricdən isə qulağına maqnitlə birləşdiriləcək. Eşitmə ancaq bu şəkildə mümkün olacaq. Bu həkimin bir neçə uğurlu əməliyyatı haqqında eşitmişik”.
Babası Eldar Qocayev isə yeganə nəvəsinin bu problemini həll etmək gücündə olmadıqlarını deyir: “Qızım həyat yoldaşı və nəvəmlə birgə kirayədə qalırlar. Ailənin gəliri gündəlik ehtiyaclarını, kommunal və kirayə haqqını ödəməyə çətinliklə yetir. Əminənin nitqinin bərpası üçün 7 ay zamanımız var, bu vaxta qədər o pulu toplamamız imkansızdır. O biri babası yeni ürək əməliyyatı keçirib, iş qabiliyyəti yoxdur, mənim də elə bir imkanım yoxdur. 35 min manata görə nəvəmin ömürlük eşitmə qüsurlu qalmasına dözə bilmirik. Səhiyyə Nazirliyinə müraciət etmişik, lakin orada yüzlərlə uşaq növbədədir. Onu gözləsək, gecikə bilərik və bu şansı ömürlük itirə bilərik”.
Məlumat üçün qeyd edək ki, sözügedən əməliyyat koxlear implantasiya adlanır. Koxlear implant – bu mürəkkəb tibbi elektron qurğudur ki, o, nitq prosessorundan elektromaqnit siqnallarını qəbul edir, onları elektrikə çevirir və daxili qulağın ilbizindəki eşitmə sinirinin stimulyasiyası vasitəsilə baş beyin strukturlarına səsləri tanımağa imkan verir. Koxlear implant unikal tibbi cihazdır ki, sensonevral karlığın (ağır eşitmə) ifadəli və ya ağır təzahürləri olan bəzi xəstələrə eşitmə qabiliyyətini geri qaytarmağa imkan yaradır. Dünyada 400 000-dən çox uşaq və böyük yaşlı vardır ki, onlar implant sayəsində fəal həyat tərzinə geri qayıtmaq şansını əldə ediblər. Koxlear implant iki əsas komponentdən – daxili və xarici – ibarətdir. Daxili, görünməyən element öz növbəsində qulağın arxasında, dərinin altında yerləşən “qəbuledicidən” və elektroddan ibarətdir ki, o, cərrahi əməliyyatın köməkliyi ilə bilavasitə daxili qulaq nahiyəsinə implantasiya edilir ki, məhz burada zədələnmiş “tükcük” hüceyrələri yerləşirlər.
Xarici komponent – bu minikompüter və ya nitq prosessorudur. Həmin prosessor ətraf mühitin səslərini tutur və onları elektrik impulslarına çevirir və daxili komponentə göndərir, hansı ki, o da öz növbəsində implantasiya edilmiş elektrod vasitəsilə impulsları eşitmə sinirinə ötürür. Eşitmə siniri üzrə siqnallar baş beyinə ötürülür ki, burada onlar səs kimi qəbul edilir. Səsin daxil olmasından başlayaraq onun baş beyində işlənməsinə qədər çəkən tam proses o qədər sürətlə baş verir ki, istifadəçi səsi o, yarandıqdan dərhal sonra eşidir. Koxlear implant, yəni anadangəlmə eşitmə qüsurlu uşaqlarla bağlı əməliyyat 0-3 yaşları arasında olmalıdır. Çünki bu yaşlardan sonra aparılan əməliyyatların heç bir xeyri olmur. Həmin uşaqlar nəinki eşidə, hətta danışa da bilmirlər. Ona görə həmin uşaqların 0-3 yaşları arasında əməliyyat edilmələri vacibdir və mütləqdir.
Əminə üçün bank hesabı da açılıb. Hesab anasının adınadır. Sosial şəbəkələrdə yayıldıqdan sonra bir həftəyə 569 manat toplanıb. Yardım etmək istəyənlər üçün hesab nömrəsini təqdim edirik.
Ödənişləri Milliön və E-manat ödəmə terminalları vasitəsilə, Respublika bankından həyata keçirmək mümkündür.
Hesab kodu: 380194400968845201
Şəxsiyyət vəsiqəsinin seriya nömrəsi: AZE N: 16818704
Əlaqə nömrəsi (+994 77) 717 95 07
