ABŞ Suriyada İranın dəstəklədiyi hədəfləri vurur
ABŞ-ın müdafiə naziri Ostin prezident Baydenin göstərişi ilə Suriyanın şərqində İran İnqilabı Keşikçiləri Korpusu və ona bağlı qrupların istifadə etdiyi iki obyektə hava zərbəsi endirdiyini açıqlayıb.
Bildirilib ki, əməliyyat oktyabrın 17-dən etibarən İranın dəstəklədiyi milis qruplarının İraq və Suriyada ABŞ hərbçilərinə qarşı silsilə hücumlarına cavab olaraq özünümüdafiə çərçivəsində həyata keçirilib.
ABŞ-ın müdafiə naziri Ostin deyib: "Birləşmiş Ştatlar münaqişəyə can atmır və bundan sonra da hərbi əməliyyatlarda iştirak etmək niyyəti və ya istəyi yoxdur, lakin İranın ABŞ qüvvələrinə qarşı dəstəklədiyi bu hücumlar qəbuledilməzdir və dayandırılmalıdır. İran qüvvələrimizə edilən bu hücumlarda rolunun olduğunu inkar etmək istəyir, amma biz buna imkan verməyəcəyik. İranın subpodratlı qüvvələrinin ABŞ qüvvələrinə qarşı hücumları davam edərsə, xalqımızı qorumaq üçün lazımi tədbirləri görməkdən çəkinməyəcəyik. Bütün dövlətləri və qeyri-dövlət təşkilatlarını daha geniş regional münaqişəyə çevriləcək hərəkətlərdən çəkinməyə çağırmaqda davam edirik”.
