Pakistanda siyasi partiya tərəfdarları arasında toqquşmada 1 nəfər ölüb
Pakistanın Kəraçi şəhərində siyasi partiya tərəfdarları arasında baş verən qarşıdurmada 1 nəfər ölüb, 1 nəfər yaralanıb.
Geo News televiziyasında yer alan xəbərə görə, Kəraçinin Nazimabad bölgəsində Pakistan Xalq Partiyası (PPP) ilə Birləşmiş Xalq Hərəkatı Partiyasının (MQM-P) tərəfdarları arasında münaqişə baş verib.
PPP ilə MQM-P tərəfdarları arasında baş verən qarşıdurmada 1 nəfər başından güllə yarası alaraq dünyasını dəyişib, 1 nəfər isə yaralanıb.
Hadisələr zamanı ərazidə olan 2 avtomobil şəxsiyyəti hələlik müəyyən edilməyən şəxslər tərəfindən yandırılıb.
Sosial şəbəkələrdə yayılan görüntülərdə iki qrupun bir-birinə stul atdığı görülüb.
Pakistanda fevralın 8-də keçiriləcək ümumi seçkilər ərəfəsində siyasi partiya tərəfdarları arasında gərginlik artıb.
