ABŞ-da şirkətlərin ixtisar dalğası artmaqda davam edir
ABŞ-da keçən ildən bəri aramsız olaraq davam edən ixtisarlar şirkətlərin səmərəliliyi artırmaq və xərcləri azaltmaq səyləri sayəsində artmaqda davam edir.
İnflyasiya və qlobal iqtisadi qeyri-müəyyənliklərə qarşı artan faizlərin təzyiqi altında olan şirkətlər qənaət siyasətlərini davam etdirirlər.
Daha az resursla daha çox iş görməyi hədəfləyən şirkətlər, işçilərin sayını azaltmaqla yanaşı, səmərəliliyə diqqət yetirirlər.
Şirkətlərin süni intellektə və avtomatlaşdırmaya diqqət yetirməsi də işçilərin ixtisarının səbəblərindən biri kimi göstərilir.
Süni intellektlə bağlı həyəcan şirkətləri öz resurslarını bu sahəyə yönəltməyə və işçi qüvvələrində avtomatlaşdırmanı artırmağa məcbur edir.
Çikaqoda yerləşən qlobal işə yerləşdirmə və karyeraya keçid firması olan "Challenger, Gray & Christmas"ın məlumatlarına görə, ABŞ-da işdən çıxarılanların sayı fevral ayında keçən ilin eyni dövrü ilə müqayisədə 9 faiz artaraq 84 min 638-ə çatıb. Bu rəqəm ötən ilin martından bəri ən yüksək həddə çatıb.
Ölkədə işdən çıxarılanların sayı ötən il əvvəlki ilə nisbətən 98 faiz artaraq 721 min 677 nəfərə çatıb.
Texnologiyadan istehsala, maliyyə xidmətlərindən pərakəndə satışa qədər bir çox sektorda şirkətlər işçilərin sayını azaldarkən, işdən çıxarmaların texnologiya sektorunda daha çox baş verməyə davam etdiyi müşahidə edilib.
!Challenger, Gray & Christmas"ın məlumatlarına görə, bu il texnologiya sektorunda 12 min 412-si fevral ayında olmaqla 28 min 218 adam işdən çıxarılıb.
