Pakistanda həbsxanadan 19 məhbus qaçıb
Pakistanın Azad Cammu və Kəşmir bölgəsindəki Ravalakot həbsxanasından 6-sı ölüm cəzasına məhkum edilmiş 19 məhbus qaçıb.
"Dawn" qəzetinin yazdığına görə, Azad Cammu və Kəşmirin Poonç rayonundakı Ravalakot həbsxanasında silahlı məhbus nahar vaxtı mühafizəçidən zorla açarları alıb və kameraların kilidini açıb.
6-sı ölüm cəzasına məhkum edilmiş 19 məhbus təhlükəsizlik səhlənkarlığından istifadə edərək həbsxanadan qaçıb.
Xəbərlərdə məhbusun silahı necə və haradan əldə etməsi ilə bağlı məlumat verilməsə də, qaçış zamanı mühafizəçilərlə münaqişədə yaralanan məhbuslardan birinin xəstəxanada öldüyü bildirilib.
Həyəcan vəziyyətində olan polis məhbusları tutmaq üçün Poonç bölgəsinə giriş-çıxışı bağlayıb.
Azad Cammu və Kəşmirin İnformasiya Katibi Ansar Yakup mətbuata açıqlamasında bildirib ki, nəzarətçi müavini də daxil olmaqla 8 həbsxana məmuru istintaq üçün saxlanılıb.
