ABŞ Məxfi Xidməti yüksək vəzifəli şəxsləri qorumaq üçün maliyyə çətinliyi yaşayır
ABŞ Məxfi Xidmətinin rəhbəri vəzifəsini icra edən Ronald Rou keçmiş prezident Donald Trampa qarşı iki sui-qəsd cəhdindən sonra Konqresdən agentliyə investisiyaların əhəmiyyətli dərəcədə artırılmasını xahiş edib.
AFN.az xəbər verir ki, bu barədə "Washington Post" məlumat yayıb.
“ABŞ prezidentlərinin, keçmiş prezidentlərinin və digər yüksək rütbəli məmurların müdafiəsi üçün daha çox əks-snayperlərə, müstəntiqlərə, kortejlər üçün təkmilləşdirilmiş zirehli limuzinlərə və daha çox gülləkeçirməz şüşələrə böyük ehtiyac var” - deyə Rou bildirib. O, həmçinin qeyd edib ki, agentliyin Merilend ştatında qocalmış təlim mərkəzində real həyatda baş verən hücumlar üçün agentlər yetişdirməkdən ötrü studiyalar yoxdur və işçilər hipersayıqlıq vəziyyətində olması lazım olduğundan daha çox işləyirlər.
Sentyabrın 15-də ABŞ Federal Təhqiqatlar Bürosu (FTB) Trampın qaldığı Florida ştatının Palm-Biç şəhərindəki “Trump International Golf Club”da baş verən atışma ilə bağlı araşdırma elan edib. Hadisə ona sui-qəsd cəhdi kimi qiymətləndirilir. Şübhəli 58 yaşlı Rayan Uesli Rut saxlanılıb. Onun gizlənməyə çalışdığı qolf klubunun yaxınlığındakı kolluqlar arasında teleskopik nişangahı olan AK-47 avtomatı, keramika lövhələri olan iki kürək çantası və aksiyon kamerası aşkar edilib.
Bundan əvvəl Trampa qarşı daha bir sui-qəsd cəhdi olub. Təcavüzkar yerində öldürülüb.
