İsveçdə ifrat sağçı qruplar 10 yaşlı uşaqları hədəf alır
Son illər İsveçdə ifrat sağçı qrupların strukturu və fəaliyyətləri sürətlə dəyişir. Ölkədə fəaliyyət göstərən bu qruplar onlayn platformalar vasitəsilə gəncləri cəlb etməklə öz zorakı ideologiyalarını yayırlar.
İsveçdəki "Agera Värmland" qrupunda çalışan sosioloq Lars Stiernelöf xüsusilə son aylarda məktəblərdə nasist salamı verən uşaqların sayında artım müşahidə etdiyini bildirib.
Stiernelöf uşaqların bu davranışı Adolf Hitlerə hörmət olaraq etmədiyini, lakin bəzi məşhur adların bu hərəkətdən istifadə etməsinin onlar üçün cəlbedici olduğunu bildirir.
İsveçdə uzun müddətdir mövcud olan ifrat sağçı hərəkatlar son zamanlar yeni bir quruluşa bürünüb.
İfrat sağda araşdırmalar aparan "Expo" institutunun məlumatına görə, 2023-cü ildə bu qrupların sayı 2008-ci ildən bəri ən yüksək səviyyəyə çatıb.
"Nordic Resistance Movement" (Nordiska Motståndsrörelsen - NMR) kimi ənənəvi neo-nasist strukturların gücü getdikcə azalsa da, onların yerində daha kiçik və çevik qruplar yaranır.
"Aktivklubb Sverige" və "Gym XIV" kimi təşkilatlar gəncləri onlayn platformalar vasitəsilə cəlb edir və fiziki gücün vacib olduğu zorakılıq ideologiyasını yayır.
Stiernelöf deyir ki, ifrat sağçı qruplara qoşulan insanların profili də dəyişir. Əvvəllər seçilmək və diqqət çəkmək istəyən gənclər bu qruplara qoşulurdularsa, bu gün internetdə tənha qalan və sosial əlaqənin olmadığını hiss edən uşaqlar bu qrupların hədəf auditoriyasına çevrilib.
İsveç təhlükəsizlik xidməti Säpo-nun son hesabatı xəbərdarlıq edib ki, ifrat sağçı zorakı qruplar rəqəmsal platformalar və onlayn oyun mühitlərindən istifadə edərək gəncləri radikallaşdırmaq sürətini artırır. "Təhlükəsizlik xidməti hələ yetkinlik yaşına çatmamış uşaqlarla bağlı işlərlə məşğul olur", - hesabatda deyilir.
İsveçdə ifrat sağçı hərəkatlar təkcə sosial media və zorakı hərəkətlərlə deyil, həm də siyasi arenada təsir göstərməyə başlayıb. 2022-ci il seçkilərində güclərini artıran ifrat sağçı İsveç Demokratları ölkədə cinayət nisbətinin artmasında mühacirləri günahlandıran diskursları ilə gündəmə gəlib.
Siyasi xətlərin dəyişməsi ifrat sağçı qrupların əsas cəmiyyətlə daha çox inteqrasiya edə biləcəyi ilə bağlı narahatlıq yaradır. Ekspertlərin fikrincə İsveçdə artan qütbləşmə ifrat sağçı ideologiyaların daha geniş auditoriyaya yayılmasına səbəb ola bilər.
İfrat sağçıların mediada, siyasətdə və onlayn platformalarda təsiri artdıqca, ekspertlər bu təhlükəyə daha erkən yaşda müdaxilə etməyin zəruriliyi barədə xəbərdarlıq edirlər.
"Uşaqların zorakı qruplara qoşulması gələcəkdə sosial iğtişaşların kökü ola bilər. Ona görə də erkən ehtiyat tədbirlərinin görülməsi vacibdir", - Stiernelöf bildirib.
