Polşa hökuməti 2027-ci ilə qədər 100 000 könüllü yetişdirməyi planlaşdırır
Polşa hökuməti gələn ildən yeni könüllü hərbi təlim proqramına başlamaq istəyir və 2027-ci ilə qədər 100 000 könüllü yetişdirmək niyyətindədir.
AFN.az "Reuters"ə istinadən xəbər verir ki, bunu Polşanın baş naziri Donald Tusk bildirib.
"Bizim üçün ən vacibi odur ki, hər bir maraqlanan şəxs 2026-cı ildən gec olmayaraq bu cür təlimlərdə iştirak edə bilsin. Bu, çətin işdir, lakin mən bilirəm ki, bunu etmək olar", - deyə Tusk hökumətin iclasından əvvəl deyib.
“2027-ci ildə biz 100 min könüllü yetişdirmək imkanlarına nail olacağıq... Peşəkar ordudan əlavə və Ərazi Müdafiə Qoşunlarından əlavə faktiki olaraq ehtiyatda olanlardan ibarət ordu yaratmalıyıq və hərəkətlərimiz bu məqsədə xidmət edəcək”, - deyə o əlavə edib.
Tusk bildirib ki, hökumət, məsələn, hərbi təlim zamanı insanlara peşəkar sürücülük vəsiqələri, o cümlədən ağır nəqliyyat vasitələri üçün almağa icazə verilməsi imkanlarını nəzərdən keçirəcək: “Müharibə zamanı faydalı olacaq, lakin bu cür ixtisaslara maraq göstərənlər üçün həyatda da faydalı olacaq. Hökumət konkret peşəkar qruplar üçün ixtisaslaşdırılmış təlimlərin təşkili imkanlarını da nəzərdən keçirir".
Tusk daha sonra X sosial şəbəkəsində yazıb ki, o, nazirlərə hökumət üzvləri və məmurların da könüllülük əsasında təlim keçəcəklərini deyib və bunun tam anlayışla qarşılandığını bildirib.
