Saqqız çeynəməyi xoşlayırsınız? 250 min mikroplastik çeynəmiş ola bilərsiniz
Yeni bir araşdırma göstərib ki, sadəcə bir saat ərzində saqqız çeynəmək insan tüpürcəklərində 250 min mikroplastik hissəcik buraxa bilər.
Şimali İrlandiyadakı Queens Universiteti tərəfindən aparılan və "Journal of Hazarous Materials" jurnalında dərc edilən araşdırma saqqızın potensial zərərli maddələrin bədənə daxil olmasına səbəb ola biləcəyini göstərib.
Mikroplastiklər daha böyük plastik məhsulların parçalanması nəticəsində yaranan kiçik plastik hissəciklərdir.
Onlar sintetik parçalardan mikrofiberlər kimi mənbələrdən yayılır.
Araşdırmada mikroplastiklərin zamanla daha kiçik parçalara parçalanaraq nanoplastikaya çevrildiyi və bunun tüpürcəkdə də təsbit edildiyi bildirilib.
Tədqiqatda tüpürcəyə nə qədər mikroplastik keçdiyini ölçmək üçün "avtomatik Raman spektroskopiyası" adlı texnika istifadə edilib.
Tədqiqatçılar mikro və nano plastiklərin bədənə müxtəlif yollarla daxil ola biləcəyini və həzm sistemi, ağciyərlər və reproduktiv sistemə zərər verə biləcəyini bildiriblər.
Tədqiqata qatılan Queen's Universitetinin doktorantı Udit Pant analiz edilən tüpürcək nümunələrinin üç fərqli zaman aralığında toplandığını ifadə etdi:
0-20 dəqiqə
20-40 dəqiqə
40-60 dəqiqə
Pant bütün nümunələrdə mikro və nano plastiklərin tapıldığını deyib.
Elm adamları bu cür hissəciklərin insan sağlamlığına uzunmüddətli təsirlərinin bilinmədiyini vurğulasa da, araşdırmada istifadə edilən metodun plastik çirklənməni azaltmağa kömək edə biləcək daha sərfəli bir vasitə təqdim edə biləcəyini ifadə ediblər.
