Dünyada yeni kömür tutumu son 20 ildə ən aşağı səviyyədədir
2024-cü ildə dünyada istismara verilən yeni kömür tutumu son 20 ildə ən aşağı səviyyədə olub.
Qlobal Kömür Elektrik Stansiyasının İzləyicisi Layihəsi çərçivəsində bu il 10-cu dəfə beynəlxalq qeyri-hökumət təşkilatı "Global Energy Monitor" tərəfindən hazırlanan "Yüksəlmə və Çöküş" hesabatı dərc olunub. Hesabat dünyada demək olar ki, bütün kömürlə işləyən elektrik stansiyalarını və bu sahədəki planları əhatə edir.
Məlumata görə, ötən il dünyada 44 giqavatlıq yeni kömür elektrik stansiyasının gücü istismara verilib.
Bu, son 20 ilin ən aşağı səviyyəsi olaraq gözə çarparaq, dünyada kömürdən istifadənin azaldığının güclü əlaməti hesab olunur. Ötən il dünyada istismara verilən 44 giqavat yeni kömür gücü ilə müqayisədə 25,2 giqavatlıq quraşdırılmış istilik elektrik stansiyaları bağlanıb. Beləliklə, qlobal kömür tutumu illik əsasda 1 faizdən az artaraq 2024-cü ildə 18,8 giqavata çatıb.
Keçən il istifadəyə verilmiş 44 giqavatlıq yeni kömür gücü də 2004-2024-cü illərdə istismara verilmiş 72 giqavatlıq illik orta gücdən təxminən 30 giqavat aşağı olub.
Keçən il yalnız səkkiz ölkə kömürlə işləyən yeni elektrik stansiyaları təklif edib. 2023-cü ildə bu rəqəm 12 olub. İqtisadi Əməkdaşlıq və İnkişaf Təşkilatına (OECD) üzv olan 38 ölkədə yeni kömürlə işləyən elektrik stansiyaları ilə bağlı təkliflər 2015-ci ildəki 142 səviyyəsindən 5-ə düşüb.
