Ağırlıq qaldırmaq beynin qocalmasını ləngidir
Braziliyada aparılan bir araşdırma çəki məşqlərinin yaddaş qabiliyyətini yaxşılaşdıraraq Alzheimer riskindən qoruduğunu ortaya qoyub.
San-Pauludakı Campinas Universitetinin alimləri tərəfindən aparılan araşdırmada yüngül koqnitiv pozğunluğu olan 44 nəfər müayinə olunub. Altı ay ərzində həftədə iki dəfə ağırlıq qaldıran iştirakçılar yaddaşında və beyin strukturunda əhəmiyyətli irəliləyişlər göstərib, idman etməyən qrupda isə idrak qabiliyyəti zəifləyib.
Tədqiqat çəki məşqlərinin Alzheimer xəstəliyi ilə əlaqəli olan hipokampus və prekuneus bölgələrində kiçilmənin qarşısını aldığını müəyyən edib. Bundan əlavə, ağ maddənin bütövlüyündə irəliləyişlər aşkar edilmişdir ki, bu da neyronların sağlamlığını göstərir.
Braziliya Neyrologiya və Neyrotexnologiya İnstitutunun (BRAINN) çətiri altında aparılan araşdırmada iştirakçılar iki qrupa bölünüb. Birinci qrup həftədə iki dəfə orta və yüksək intensivlikli çəkiləri qaldırıb, nəzarət qrupunda olanlar isə heç bir fiziki fəaliyyət göstərməyiblər. Nəticələr ağır atletika qrupunun şifahi yaddaş və neyron bütövlüyü baxımından daha yaxşı çıxış etdiyini ortaya qoyub.
Alimlər deyirlər ki, uzunmüddətli çəki məşqlərinin demensiyaya təsirini daha yaxşı başa düşmək üçün əlavə tədqiqatlara ehtiyac var.
Tədqiqat həmçinin göstərib ki, ağırlıq qaldırmaq beyni iki əsas mexanizmlə qoruyur: neyron artım faktorlarını artırmaqla və bədəndə iltihabı azaltmaqla.
Tədqiqatçılar bu cür məşqlərin demensiyaya qarşı ucuz və təsirli bir tədbir ola biləcəyini vurğulayaraq, ictimai sağlamlıq siyasətlərində fiziki təlimçilərə daha çox yer verilməli olduğunu bildiriblər.
