Venesiyaya giriş iki dəfə bahalaşdı
İtaliyanın dünyaca məşhur turizm mərkəzi Venesiyada keçən il başladılan giriş haqqı tətbiqi bu cümə günündən etibarən yenidən qüvvəyə minir. Bu ilki təcrübənin ən diqqətçəkən cəhəti odur ki, son dəqiqədə gələn gündəlik ziyarətçilər ikiqat haqq ödəyəcəklər.
Keçən il Venesiya izdihamlı dövrlərdə gündəlik turistlərin qarşısını almaq məqsədi daşıyan pilot sxemin bir hissəsi olaraq, giriş haqqı tələb edən dünyada ilk böyük turizm şəhəri olub. Tətbiq ziyarətçilərin sayını azaltmaqda təsirli olmasa da, gözlənilmədən şəhər büdcəsinə 2,4 milyon avro gəlir gətirib.
Səlahiyyətlilər bu tətbiqin uzunmüddətli perspektivdə Birləşmiş Millətlər Təşkilatının Təhsil, Elm və Mədəniyyət Təşkilatı (UNESCO) tərəfindən dünya irsi olaraq kimi tanınan şəhərə həddindən artıq turizmin təzyiqi ilə mübarizə aparmaq üçün töhfə verəcəyi qənaətindədir.
Bu il 5 avro olaraq təyin olunan giriş haqqı şəhərə gəlməzdən əvvəl üç gün ərzində alınarsa, 10 avroya qədər artacaq. Müraciət aprelin 18-dən iyulun 27-dək 54 gün ərzində etibarlı olacaq ki, bunun da əksəriyyəti həftə sonlarına təsadüf edir. Bu, keçən ilki müraciətlə müqayisədə təxminən iki dəfə çox gün deməkdir. Ödəniş səhər saat 08.30-dan günorta 16.00-a qədər tətbiq olunacaq.
Ziyarətçilər Venesiyanın əsas giriş nöqtələrini yoxlayan məmurlara göstərmək üçün QR kodu alırlar. Bu nöqtələr arasında Venezia Santa Lucia qatar stansiyası var.
Venesiyada gecələmək üçün yer sifariş edən turistlər, Veneto bölgəsinin sakinləri və 14 yaşdan kiçik uşaqlar bu təcrübədən azaddırlar. Bununla belə, otel rezervasiyası olan ziyarətçilərin də sistem vasitəsilə qeydiyyatdan keçmələri tələb olunur.
2024-cü il Venesiyaya və ətrafına gələn turistlərin sayına görə rekord qıran il olub. Tarixi şəhər mərkəzində gecələyən turistlərin sayı 3,9 milyonu keçdiyi halda, ildə təxminən 30 milyon insan şəhəri cəmi bir günə ziyarət edir. Yerli medianın məlumatına görə, indiyədək 35 mindən çox insan giriş haqqı ödəyərək sistemdə qeydiyyatdan keçib.
Turizmdən məsul Venesiya Şəhər Şurasının üzvü Simone Venturini giriş haqqı tətbiqinin möcüzəvi həll olmadığını, lakin turist hərəkətliliyini təhlil etmək və idarə etmək üçün konkret və innovativ alət olduğunu deyib.
Ötən il turistlərin əksəriyyəti bu praktikanı alqışlasa da, Venesiya əhalisi bu tədbirə qarşı çıxmaqda davam edir. Şəhər sakinləri dayanıqlı turizm üçün əsl həll yolunun qısa müddətli tətil icarələrini məhdudlaşdırmaq və il boyu yaşayan əhali üçün xidmətləri inkişaf etdirmək olduğunu müdafiə edirlər. 2022-ci ildə Venesiyanın daimi əhalisi ilk dəfə olaraq 50 mindən aşağı düşüb.
