Tramp demokratları İranla bağlı məlumatları sızdırmaqda ittiham etdi
ABŞ prezidenti Donald Tramp demokratları Vaşinqtonun İrana zərbələrinin nəticələrinə dair ABŞ kəşfiyyatının ilkin məlumatlarını jurnalistlərə ötürməkdə ittiham edib və onların cavab verməli olduqlarını bildirib.
AFN.az xəbər verir ki, o bu barədə "Truth Social"da yazıb. "Demokratlar İranın nüvə obyektlərinə edilən qüsursuz hava hücumunu sızdırıblar. Onlar cavab verməlidirlər", - deyə ABŞ prezidenti bildirib. O, müxalif Demokrat Partiyasının hansı üzvünü nəzərdə tutduğunu dəqiqləşdirməyib.
Ağ Evin mətbuat katibi Karoline Leavitt iyunun 25-də bildirmişdi ki, kəşfiyyat məlumatlarını CNN-ə sızdıran işçi həbs cəzasına məhkum edilməlidir. Onun sözlərinə görə, FTB məlumatı kimin sızdırdığını tapmaq üçün araşdırma aparır.
