ABŞ Kanadaya 35 faiz gömrük rüsumu tətbiq edəcək
ABŞ Prezidenti Donald Tramp 1 avqustdan etibarən Kanadadan idxal olunan mallara sektoral tariflərdən əlavə olaraq 35 faiz gömrük vergisi tətbiq ediləcəyini açıqlayıb.
Tramp bu barədə Truth Social sosial media platformasındakı hesabından Kanadaya yönəlmiş tarif məktubunu paylaşaraq məlumat verib.
Məktubun Kanadanın cavab tədbirlərinə baxmayaraq ABŞ-ın bu ölkə ilə əməkdaşlığı davam etdirmək niyyətində olduğunu göstərdiyini bildirən Tramp, Kanadaya fentanil böhranı ilə mübarizə çərçivəsində artıq gömrük vergiləri tətbiq edildiyini xatırladıb.
Kanadanın bu tədbirlərə qarşılıq olaraq ABŞ ilə əməkdaşlıq etmək əvəzinə cavab rüsumları tətbiq etdiyini vurğulayan Tramp 1 avqustdan etibarən Kanadadan ABŞ-a göndərilən mallara bütün sektoral tariflərdən əlavə olaraq 35 faiz gömrük vergisi tətbiq olunacağını əlavə edib.
Tramp vurğulayıb ki, başqa ölkələr üzərindən Kanadadan idxal olunan mallar da bu yüksək tariflərdən qaçmaq üçün istifadə edildiyi təqdirdə daha da yüksək rüsumlarla üzləşəcək.
O, Kanada şirkətlərinin ABŞ ərazisində istehsal fəaliyyəti həyata keçirməsi halında bu mallara heç bir gömrük rüsumunun tətbiq edilməyəcəyini, hətta müvafiq təsdiqləmə prosedurlarının sürətləndiriləcəyini qeyd edib.
Tramp həmçinin bildirib ki, Kanada hansısa səbəbdən ABŞ-ın tətbiq etdiyi tariflərə cavab olaraq öz rüsumlarını və hər hansı əlavə faiz artırmaq qərarına gəlsə, onlar 35 faizlik tarifə əlavə olunacaq.
Tramp vurğulayıb ki, fentanil axını ABŞ və Kanada arasında yaşanan yeganə problem deyil. O, Kanadanın ABŞ-a qarşı davamlı ticarət kəsirlərinə səbəb olan bir çox tarif və tarifdənkənar ticarət maneələri tətbiq etdiyini deyib.
