Hindistanda halal sertifikatının qadağan edilməsi tələbi mübahisə yaratdı
Hindistanda hakim Bharatiya Janata Partiyasının (BJP) deputatı və sabiq nazir Basanagouda R. Patil Yatnal halal sertifikatı tətbiqinin ölkə üzrə qadağan olunması çağırışı ilə çıxış edərək mübahisə yaradıb.
Karnataka ştatının Vijayapura şəhərini təmsil edən BJP deputatı və keçmiş nazir Basanagouda R. Patil Yatnal daxili işlər naziri Amit Şaha ünvanladığı məktubda halal sertifikatı verən bütün qurumların və üzərində “halal” yazısı olan məhsulların qadağan edilməsini tələb edib.
Yatnal bildirib ki, halal sertifikası İslam şəriətinə əsaslanan bir tətbiqdir və Hindistan Konstitusiyasında onun heç bir hüquqi qarşılığı yoxdur. O, qida təhlükəsizliyi və standartlarına nəzarət edən yeganə rəsmi qurumun Hindistan Qida Təhlükəsizliyi və Standartları İdarəsi (FSSAI) olduğunu qeyd edərək “FSSAI mövcud olduğu halda dini əsaslı başqa sertifikatlaşdırma qurumlarına niyə ehtiyac duyulur?” deyib.
Deputat həmçinin iddia edib ki, Helal India, Jamiat Ulama-i-Hind Helal Trust və bu kimi təşkilatların topladıqları vəsaitlər qanunsuz fəaliyyətlərin maliyyələşdirilməsində istifadə oluna bilər. Bu iddialar rəsmi qeydlərdə təsdiqlənməsə də Yatnal halal sertifikatının iqtisadi baxımdan müsəlman müəssisələrinə üstünlük verdiyini, digər icmalara isə zərər yetirdiyini söyləyib.
Yatnal Uttar Pradeş ştatının qısa müddət əvvəl halal sertifikatı verən qurumları qadağan etdiyini xatırladaraq, eyni tətbiqin ölkə miqyasında da həyata keçirilməsini tələb edib. Bu çağırış ölkədə dini kimliyin ticarət və ictimai həyatdakı roluna dair gərginliyi yenidən gündəmə gətirib.
Hüquqşünaslar isə bildirirlər ki, FSSAI qida təhlükəsizliyinə nəzarət etməklə məsuldur, halal və ya kaşer kimi dini sertifikatlar istehlakçı seçimlərinə əsaslanır. Mütəxəssislərin fikrincə, bu sahədə açıq hüquqi tənzimləmə olmadığından mübahisə konstitusiya, dünyəvilik və istehlakçı hüquqları kimi geniş mövzular ətrafında cəmlənir.
