Yaponiya əhali böhranı ilə mübarizə üçün yeni strategiya mərkəzi qurdu
Yaponiyada Baş nazir Takaiçi Sanae ölkənin ən böyük probleminin azalan əhali nisbəti olduğunu bildirərək, böhranla mübarizəyə yönəlmiş yeni bir təşkilat qurduqlarını açıqlayıb.
Tokio rəhbərliyindən verilən açıqlamaya görə, Baş nazir Takaiçi ölkə üzrə azalan əhali nisbətləri ilə mübarizə tədbirlərinin yayılması məqsədilə yeni Əhali Strategiyası Mərkəzini yaradıb.
Mərkəzin açılışında danışan Takaiçi “Ölkənin ən böyük problemi əhali azalmasıdır” deyib.
Böhran əleyhinə tədbirləri əhatəli şəkildə təşviq etmək üçün bu mərkəzi yaratdıqlarını bildirən Takaiçi mərkəzin konkret siyasətləri sayəsində hər vətəndaşın öz seçdiyi bölgədə həyatını davam etdirəcəyi bir cəmiyyət yaratmağı hədəflədiklərini bildirib.
Əlavə dəyər yaradan yeni regional iqtisadiyyatlar yaratmağı hədəflədiklərini qeyd edən Takaiçi yerli bələdiyyə idarələrinə əhali azalması ilə mübarizədə dəstək verəcəklərini söyləyib.
Takaiçi azalan əhali nisbəti ilə mübarizə tədbirlərinin ölkə üzrə yayılmasını təmin etməyi məqsəd qoyduqlarını vurğulayaraq, mərkəz çərçivəsində müvafiq kabinə üzvlərinə vəzifələrini təhvil verib.
Takaiçinin rəhbərlik edəcəyi mərkəz sosial təminat islahatlarının fayda və yük əsasında yenidən qiymətləndirilməsini, əhali böhranına dair əhatəli tədbirlərin geniş tətbiqini təşviq edib, izləyəcək.
Qeyd edək ki, azalan doğum nisbətləri və yaşlı əhalinin artması Yaponiyada milli sağlamlıq sisteminin inkişafı, doğum nisbətlərinin artırılması və regional inkişaf sahələrində problemlər yaradır.
Yaponiya Əhali və Sosial Təminat Tədqiqatları Milli İnstitutunun (IPSS) son illər proqnozuna görə, 2040-cı ilə qədər 65 yaş və yuxarı şəxslərin ümumi əhaliyə nisbəti 35%-i aşacaq.
