Amnistiyanın tətbiqi qaydaları qəbul edildi
Amnistiyanın tətbiqi qaydaları qəbul edilib.
Məsələ Milli Məclisin bugünkü plenar iclasında müzakirə edilib.
Qərara əsasən amnistiya Azərbaycan Respublikası Cinayət, Cinayət-Prosessual və Cəzaların İcrası məcəllələrinin tələblərinə uyğun olaraq aşağıdakı orqanlar tərəfindən tətbiq edilir:
19.1. cəzaçəkmə müəssisələri – bu Qərarın 1-ci hissəsində və 2.1–2.4-cü bəndlərində nəzərdə tutulan şəxslər barəsində;
19.2. intizam xarakterli hərbi hissənin və hərbi hissələrin komandanlığı – bu Qərarın 2.5-ci və 2.7-ci bəndlərində nəzərdə tutulan şəxslər barəsində;
19.3. icra məmurları – bu Qərarın 2.6-cı və 2.8–2.11-ci bəndlərində nəzərdə tutulan şəxslər barəsində;
19.4. təhqiqat və ya ibtidai istintaq orqanları – bu Qərarın 4-cü hissəsində nəzərdə tutulan şəxslər barəsində;
19.5. məhkəmələr – bu Qərarın 2.12-ci və 2.13-cü bəndlərində, 3-cü və 5-ci hissələrində nəzərdə tutulan şəxslər barəsində.
20. Bu Qərarın 19.1–19.4-cü bəndlərində nəzərdə tutulan orqanlar amnistiyanın tətbiq edilməsi barədə qərarları müvafiq prokurorların razılığı ilə qəbul etməlidirlər.
21. Təhqiqat və ya ibtidai istintaq orqanları amnistiya tətbiq edərkən Azərbaycan Respublikasının Cinayət-Prosessual Məcəlləsində nəzərdə tutulmuş cinayət təqibinə xitam verilməsi qaydalarına riayət etməli, o cümlədən Cinayət-Prosessual Məcəlləsinin 41.2-ci maddəsinə müvafiq olaraq barəsində amnistiya tətbiq olunacaq şəxslərin razılığını almalıdırlar.
22. Bu Qərarın 2.12-ci və 2.13-cü bəndlərində nəzərdə tutulan şəxslər barəsində amnistiyanın tətbiq edilməsi məsələsinə həmin məhkumların üzərində nəzarəti həyata keçirən orqanların müraciəti əsasında məhkumun yaşayış yeri üzrə birinci instansiya məhkəmələri tərəfindən baxılır.
23. Bu Qərarın 3-cü hissəsində nəzərdə tutulan şəxslər barəsində amnistiyanın tətbiq edilməsi məsələsinə həmin məhkumların cəza çəkdikləri cəzaçəkmə müəssisələrinin müraciəti əsasında cəzanın çəkildiyi yer üzrə birinci instansiya məhkəmələri tərəfindən baxılır.
24. Birinci instansiya məhkəmələrinin icraatında olan, bu Qərar qüvvəyə mindiyi günədək baxılmamış cinayət işləri üzrə amnistiyanın tətbiqi məsələlərinə baxılarkən Cinayət-Prosessual Məcəlləsinin 43.3 və 44.2-ci maddələrinin tələblərinə uyğun qərarlar qəbul edilir.
25. Apellyasiya qaydasında mübahisələndirilməyən qanuni qüvvəyə minməmiş hökmlər üzrə amnistiyanın tətbiqi məsələsinə birinci instansiya məhkəmələri tərəfindən baxılır.
26. Apellyasiya şikayəti və ya protesti verilmiş hökmlər üzrə amnistiya apellyasiya instansiyası məhkəmələrində baxılarkən tətbiq edilir.
27. Kassasiya şikayəti və ya protesti verilmiş məhkəmə qərarları üzrə amnistiya kassasiya instansiyası məhkəməsində baxılarkən tətbiq edilir.
28. Məhkəmələr amnistiyanın tətbiqi zamanı Cinayət-Prosessual Məcəlləsində nəzərdə tutulmuş icraat qaydalarına riayət etməlidirlər.
29. Məhkəmə iclaslarında müvafiq prokurorun və müdafiə tərəfinin iştirakı təmin edilməlidir.
30. Bu Qərar onun təsiri altına düşən hər bir şəxs barəsində ayrı-ayrılıqda tətbiq edilir.
31. Amnistiya tətbiq edilərkən məhkumun şəxsi işi öyrənilməli və zəruri sənədlər qərara əlavə edilməlidir.
32. Vərəm xəstəliyinə tutulmuş şəxslər azad edildikdən sonra 10 gün müddətində yaşayış yeri üzrə tibb müəssisələrində qeydiyyata alınmalıdır.
33. Psixi pozuntuya görə tibbi xarakterli məcburi tədbirlər təyin olunmuş şəxslər barəsində amnistiya xüsusi qaydada tətbiq edilir.
34. Əvvəllər amnistiya və ya əfvetmə aktları tətbiq edilmiş şəxslərin cəza müddətləri nəzərə alınır.
35. Amnistiya tətbiq edilən şəxslərin sosial adaptasiyası üçün zəruri tədbirlər görülməlidir.
36. Azərbaycan Respublikası Ali Məhkəməsinin Plenumu bu Qərarın tətbiqi ilə bağlı izahlar verə bilər.
37. Amnistiyanın tətbiq edilməməsi və ya düzgün tətbiq edilməməsi ilə bağlı şikayət etmək hüququ vardır.
38. Qərarda istifadə olunan anlayışlar müvafiq qanunvericiliyə uyğun izah olunur.
39. Müvafiq orqanlar bu Qərar qüvvəyə mindiyi gündən dörd ay müddətində amnistiyanın tətbiqini təmin etməlidirlər.
