İngiltərədə şəxsi avtomobillərdə siqaret çəkmək qadağan edilir
İngiltərə hökuməti uşaqları passiv siqaret çəkmənin və elektron siqaret buxarının zərərlərindən qorumaq məqsədilə nəqliyyat vasitələrində elektron siqaret istifadəsinə qadağa qoymağa hazırlaşır. Yeni qaydalara əsasən, içərisində 18 yaşından kiçik uşaq olan şəxsi avtomobillərdə elektron siqaret istifadəsi tamamilə qadağan ediləcək.
Səhiyyə Nazirliyi tərəfindən elan edilən və hazırda məsləhətləşmə mərhələsində olan yeni plan "tüstüsüz hava sahəsi" tətbiqlərini genişləndirərək həm ənənəvi siqaretləri, həm də elektron siqaretləri hədəf alır.
Avtomobillərdə və uşaq zonalarında yeni məhdudiyyətlər
Yeni tənzimləmə çərçivəsində tərkibində 18 yaşdan aşağı uşaq olan şəxsi avtomobillərdə elektron siqaret istifadəsi qəti şəkildə qadağan olunacaq. Bu qayda ilə yanaşı uşaq oyun parkları və məktəb qarşısı kimi ərazilərdə də siqaret, elektron siqaret və qızdırılan tütün məhsullarının istifadəsi qadağa siyahısına daxil ediləcək.
Əsas tənzimləmələr:
Uşaq daşıyan bütün nəqliyyat vasitələri "vape-free" (elektron siqaretsiz) zona olacaq. Xəstəxana həyətlərində siqaret çəkmək qadağan edilsə də, siqareti tərgitməyə çalışanlara dəstək olmaq məqsədilə bu ərazilərdə elektron siqaret istifadəsinə icazə verilməyə davam edəcək. İş yerləri və ictimai nəqliyyat kimi siqaretin artıq qadağan olunduğu bütün qapalı məkanlar qızdırılan tütün və elektron siqaretləri də əhatə edəcək şəkildə genişləndiriləcək. Bar və restoranların həyətləri, həmçinin çimərliklər kimi geniş açıq sahələr bu yeni qadağalardan azad tutulacaq.
Səhiyyə naziri və ekspertlərdən xəbərdarlıqlar
Səhiyyə naziri Ves Stritinq vurğulayıb ki, heç bir uşaq oyun parkında və ya heç bir xəstə xəstəxana həyətində başqasının tüstüsünə məruz qalmamalıdır. Stritinq "Profilaktika müalicədən üstündür. Bu hökumət NHS (Milli Səhiyyə Sistemi) üzərindəki yükü azaltmaq və hər kəsin daha sağlam yaşadığı bir Britaniya qurmaq üçün qətiyyətli addımlar atır", - deyə bildirib.
İngiltərənin baş tibbi mütəxəssisi Professor Ser Kris Vittti isə passiv siqaret çəkmənin astma, vaxtındanəvvəl doğum riskləri, xərçəng və ürək xəstəliklərinə təsirinə diqqət çəkərək "Heç bir siqaret çəkən başqasına zərər vermək istəməz, lakin passiv siqaret çəkmə ilə bunu edirlər. Bu tədbirlər cəmiyyətimizin ən müdafiəsiz üzvlərini qoruyacaq" deyib.
