KİV: İsrail ABŞ-ın İrana mümkün zərbəsinə hazırlıq görür
İsrail ordusu Vaşinqtonun İrana zərbə endirmək qərarının ölkəni hazırlıqsız yaxalamaması üçün ABŞ ilə sıx koordinasiyada genişmiqyaslı hazırlıqlara başlayıb.
AFN.az xəbər verir ki, "N12" telekanalının məlumatına görə, İsrail ordusu həm müdafiə, həm də hücum xarakterli müxtəlif ssenarilərə qarşı "yüksək döyüş hazırlığı" vəziyyətinə gətirilib. Bununla belə, mülki əhali üçün təlimatlar yayan Arxa Cəbhə Komandanlığı hələlik rejimdə hər hansı sərtləşməyə getməyib.
"Ynet" portalının məlumatına görə, İsrail rəhbərliyi ABŞ Prezidenti Donald Trampın yeni nüvə sazişinin bağlanma ehtimalına inamını itirdiyi üçün yaxın günlərdə İrana zərbə əmri verə biləcəyini proqnozlaşdırır. Maraqlıdır ki, İsrailin hərbi-siyasi kabinetinin fevralın 19-na planlaşdırılan iclası heç bir izahat verilmədən fevralın 22-nə təxirə salınıb.
Baş nazir Benyamin Netanyahunun keçirdiyi qapalı məsləhətləşmələrdə İsrailin ABŞ-ın hücumunda birbaşa iştirak etmədiyi təqdirdə belə, İranın yəhudi dövlətinə raket zərbələri endirmə ehtimalı müzakirə olunub. Məlumata görə, fövqəladə hallar xidmətləri və təhlükəsizlik sisteminin bir sıra bölmələrinə artıq ən yüksək hazırlıq rejimi elan olunub.
