Yaponiya "Microsoft"a qarşı araşdırma başlatdı
Yaponiya Ədalətli Ticarət Komissiyası (JFTC) bulud texnologiyaları bazarında rəqabəti əngəlləmə şübhəsi ilə "Microsoft"un Yaponiya ofisində axtarış aparıb.
AFN.az xəbər verir ki, araşdırmanın mərkəzində şirkətin "Teams" və "Word" kimi populyar "Microsoft 365" tətbiqlərinə digər platformalardan girişi məhdudlaşdıraraq özünün "Azure" xidmətini qeyri-qanuni şəkildə ön plana çıxardığı iddiaları dayanır.
Mövzuya yaxın mənbələr tənzimləyici qurumun şirkətin ABŞ-dakı baş qərargahından da məlumat tələb etdiyini bildiriblər. "Microsoft"un Yaponiya bölməsinin sözçüsü JFTC-nin tələbləri istiqamətində qurumla tam əməkdaşlıq etdiklərini açıqlayıb, lakin davam edən proses haqqında ətraflı şərh verməkdən yayınıb.
Yaponiyanın bu addımı "Microsoft"un dünya miqyasında üzləşdiyi antiinhisar araşdırmaları dalğasının son həlqəsidir. Belə ki, İngiltərə, Avropa İttifaqı və ABŞ tənzimləyiciləri artıq şirkətin bulud texnologiyaları fəaliyyətini ayrı-ayrılıqda araşdırır. Ötən ay Braziliyanın antiinhisar agentliyi də bənzər narahatlıqlarla inzibati təhqiqat başlatmışdı.
JFTC son illərdə qlobal texnologiya nəhənglərinin inhisarçı davranışlarına qarşı nəzarəti xeyli sərtləşdirib. Məsələn, avqust ayında "Google"un "Android" istehsalçılarına təzyiq göstərməsi səbəbindən şirkətə rəsmi xəbərdarlıq edilmişdi. 2024-cü ildə isə haqsız üstünlük qazandığı iddiası ilə "Amazon"un Yaponiya ofislərində yoxlamalar aparılmışdı.
Sənaye ekspertləri qeyd edirlər ki, bulud xidmətləri bazarının sürətlə böyüməsi səbəbindən tənzimləyicilər bir neçə böyük oyunçunun kritik infrastruktura nəzarət edərək müştəriləri öz sistemlərinə "həbs etməsinin" (lock-in) qarşısını almaq istəyirlər. Hazırda "Microsoft"un bu araşdırmalar nəticəsində hansı sanksiyalarla üzləşəcəyi investorların diqqət mərkəzindədir.
