Papa XIV Leonun Peru səfərində üzünə əşya atılıb
Vatikan dövlətinin başçısı Papa XIV Leo Perunun paytaxtı Limadakı Las Palmas Hərbi Hava Bazasında xüsusi avtomobildən xalqı salamladığı zaman atılan bir əşya onun üzünə dəyib.
AFN.az xəbər verir ki, Papa XIV Leonun hərəkət marşrutunu izləyən media qurumlarının və sosial şəbəkələrdə yayılan görüntülərdə onun ağrı hiss edərək əlini üzünə apardığı, lakin avtomobilin dayanmadan hərəkətini davam etdirdiyi görünür.
Zərbənin təsiri nəticəsində Papa XIV Leonun hər hansı xəsarət alıb-almadığı ilə bağlı hələlik rəsmi açıqlama verilməyib.
Hadisəyə baxmayaraq, xalqı salamlamasını davam etdirən Papa həmin marşrut üzrə bir neçə metr irəlidə ərazidə toplaşan insanların ona uzatdığı körpəni qucağına alıb.
Papa XIV Leo daha sonra Cənubi Amerika ölkəsinə səfərinin başa çatmasını simvolizə edən dini mərasimi idarə etmək üçün qurbangaha yaxınlaşıb.
Diario Panorama qəzetinin tədbirin təşkilatçıları tərəfindən açıqlanan məlumatlara əsaslanan xəbərinə görə, Limanın Santyaqo-de-Surko rayonundakı Las Palmas Hərbi Hava Bazasında keçirilən dini mərasimdə yüz minlərlə insan iştirak edib.
Əslən ABŞ-dən olan Papa XIV Leonun Peruya səfəri, təxminən 20 il ərzində bu ölkədə missioner kimi fəaliyyət göstərməsi səbəbindən bir növ onun evə qayıdışı kimi qiymətləndirilir.
Papa Limada keçirilən yekun dini mərasimdən sonra Uruqvay, Argentina və Perunu əhatə edən 12 günlük Cənubi Amerika turunu başa vurub.

