Braziliya Konqresi MERCOSUR və Aİ arasındakı sazişi təsdiqləyib
Braziliya Milli Konqresi Cənubi Amerika Ortaq Bazarı (MERCOSUR) ilə Avropa İttifaqı arasında bağlanan azad ticarət sazişini rəsmən təsdiqləyib.
AFN.az "O Globo"a istinadən xəbər verir ki, bu barədə Federal Senatın mətbuat xidmətindən verilən açıqlamada qeyd edilir. Bu qərar iki blok arasındakı münasibətlərdə tarixi mərhələ hesab olunur. Saziş ümumi daxili məhsulu 22 trilyon dollardan çox olan və 720 milyon insanı birləşdirən dünyanın ən böyük ikitərəfli azad ticarət zonasını yaradacaq.
Qəzetin yazdığına görə, sazişin bəndləri yaxın vaxtlarda Braziliya Prezidenti Luis İnasio Lula da Silvanın fərmanı ilə milli qanunvericiliyə inteqrasiya ediləcək. Sənəd daha əvvəl Argentina, Paraqvay və Uruqvay parlamentləri tərəfindən də ratifikasiya olunub.
Buna baxmayaraq, Avropanın daxilində sənədə qarşı ciddi müqavimət davam edir. Fransa, Avstriya, Macarıstan, İrlandiya və Polşa Cənubi Amerikadan ucuz kənd təsərrüfatı məhsullarının Avropa bazarına daxil olmasından narahatdırlar. Hətta yanvarın 21-də Avropa Parlamentinin deputatları sazişin Aİ normalarına uyğunluğunun yoxlanılması üçün məhkəməyə müraciət edilməsi barədə qətnamə qəbul ediblər.
Hazırda Aİ və MERCOSUR arasındakı ticarət dövriyyəsi 112 milyard avronu ötür və bu yeni sazişin iqtisadi əlaqələri daha da genişləndirəcəyi gözlənilir.
