Ukrayna və Niderland dronların birgə istehsalı barədə razılığa gəliblər
Ukrayna Prezidenti Volodimir Zelenski və Niderlandın Baş naziri Rob Yetten dronlar sahəsində saziş üzərində işə başlamaq barədə bəyanat imzalayaraq, pilotsuz uçuş aparatlarının (PUA) birgə hazırlanması və istehsalı ilə bağlı razılıq əldə ediblər.
AFN.az xəbər verir ki, bu barədə Zelenski öz Telegram kanalında bildirib. "Drone Deal" (Dron sazişi) çərçivəsində tərəflər dronlar, raketlər, radioelektron mübarizə (REM) sistemləri və digər müdafiə texnologiyalarını birgə inkişaf etdirəcəklər.
Əməkdaşlıq müdafiə infrastrukturuna investisiya, tədqiqat, innovasiya və Ukraynanın əldə etdiyi əməliyyat təcrübəsinin mübadiləsini əhatə edəcək. Həmçinin birgə istehsalın başlanmasını nəzərdə tutan lisenziya müqaviləsi də imzalanıb.
Qeyd edək ki, Niderlandın yeni hakim koalisiyası növbəti üç il ərzində Ukraynaya dəstək üçün hər il 3 milyard avro ayırmağı və hərbi xərcləri ÜDM-in 3,5%-i səviyyəsinə çatdırmağı planlaşdırır.
