Ben Roberts-Smit girov müqabilində azadlığa buraxılıb
Avstraliyanın yaşayan ən çox medala sahib keçmiş hərbçisi Ben Roberts-Smit Əfqanıstanda müharibə cinayətləri ilə bağlı ittihamlar üzrə saxlanıldıqdan sonra girov müqabilində sərbəst buraxılıb.
AFN.az xəbər verir ki, Avstraliya Yayım Korporasiyasının (ABC) məlumatına görə, keçən həftə Sidney hava limanında saxlanılan 47 yaşlı keçmiş hərbçi Roberts-Smitin məhkəmə iclası keçirilib.
2009-2012-ci illərdə Əfqanıstanda xidmət etdiyi müddətdə silahsız şəxsləri öldürdüyü iddiası ilə beş fərqli müharibə cinayəti çərçivəsində qətl hadisəsində ittiham olunan Roberts-Smitin vəkilləri bunun görünməmiş bir məhkəmə prosesi olduğunu bildiriblər.
Məhkəmə prosesinin illərlə davam edə biləcəyini qeyd edən vəkillər Roberts-Smitin bu müddət ərzində həbsdə saxlanılmasının ədalətli mühakimə prinsiplərini təhlükəyə atacağını müdafiə ediblər. Məhkəmə prosesin mümkün müddəti ilə bağlı müdafiə tərəfi ilə razılaşaraq Roberts-Smitin girov müqabilində azadlığa buraxılması barədə qərar qəbul edib.
