Sərhədsiz Həkimlər: Ebola daha əvvəl bənzəri görülməmiş bir sürətlə yayılır
Konqo Demokratik Respublikasında baş qaldıran yeni Ebola epidemiyasının daha əvvəl bənzəri görülməmiş bir sürətlə yayıldığını elan edən Sərhədsiz Həkimlər təşkilatı virusun mövcud peyvəndi və müalicəsi olmayan nadir bir növ olduğunu açıqlayaraq beynəlxalq ictimaiyyətə xəbərdarlıq edib.
AFN.az xəbər verir ki, Konqo Demokratik Respublikasının (KDR) şərqindəki Ituri əyalətində başlayan Ebola epidemiyası beynəlxalq səhiyyə təşkilatlarını ayağa qaldırıb.
Epidemiyanın elan edilməsindən hələ cəmi iki həftə keçməsinə baxmayaraq yoluxma sayının çatdığı hədd humanitar yardım təşkilatları tərəfindən dərindən narahatlıq doğuran vəziyyət kimi qiymətləndirilib.
Sərhədsiz Həkimlər təşkilatının (MSF) baş direktor müavini Dr. Alan Qonzales tibb tarixində daha əvvəl heç bir Ebola epidemiyasında bu qədər qısa müddətdə bu dərəcədə yüksək yoluxma artımının qeydə alınmadığını vurğulayıb.
Bölgədəki qrupların virusun yayılma sürətinə çatmaqda çətinlik çəkdiyini bildirən Qonzales yüzlərlə şübhəli şəxsin test olunmağı gözlədiyini və epidemiyanın real miqyasının hələ tam olaraq müəyyən edilə bilmədiyini ifadə edib.
Səhiyyə mütəxəssislərini ən çox narahat edən məsələlərin başında epidemiyaya yol açan virusun "Bundibugyo" adlı nadir bir Ebola növü olması dayanır.
Dünya miqyasında bilinən geniş yayılmış Ebola növlərindən fərqli olaraq, "Bundibugyo" variantına qarşı hazırlanmış və effektivliyi sübut olunmuş bir peyvənd və ya xüsusi dərman müalicəsi mövcud deyil.
Yoluxan hər üç nəfərdən birinin ölümünə səbəb olan bu təhlükəli virusla mübarizə hazırda yalnız xəstələrin karantinə alınması və simptomları yüngülləşdirməyə yönəlmiş intensiv dəstək müalicələri ilə məhdudlaşır.
Bölgədəki humanitar böhranı yerindəcə araşdırmaq üçün epidemiyanın mərkəzi olan Bunia şəhərinə gedən Ümumdünya Səhiyyə Təşkilatının (ÜST) rəhbəri Dr. Tedros Adhanom Qebreyesus virusun yayılmasını dayandırmaq məqsədilə tətbiq edilən sərhəd və hava limanlarının bağlanmasının tibbi yardımları gecikdirdiyini açıqlayıb.
Konqonun şərqində uzun müddətdir davam edən daxili qarşıdurmalar da tibb işçilərinin təhlükəsizliyini təhdid edərək filyasiya və dezinfeksiya işlərini ləngidir.
Epidemiyanın qonşu ölkə Uqandaya da sıçrayaraq can itkisinə səbəb olmasından sonra beynəlxalq uçuş xətlərində və bölgə hava limanlarında məcburi dezinfeksiya stansiyaları qurularaq genişmiqyaslı gigiyena kampaniyasına başlanılıb.
ÜST rəhbəri Qebreyesus yerli əhaliyə müraciət edərək epidemiyanın nəzarət altına alına bilməsi üçün ənənəvi vərdişlərin müvəqqəti olaraq dayandırılmalı olduğu barədə xəbərdarlıq edib.
O, xüsusilə həyatını itirən yaxınlarına son borcu yerinə yetirmək məqsədilə icra edilən toxunma və yuma rituallarının virusun tüpürcək, qan və tər kimi bədən mayeləri vasitəsilə sağlam insanlara sürətlə yoluxmasına zəmin hazırladığını xatırladıb.
Digər tərəfdən, Braziliya kimi uzaq coğrafiyalarda da Konqodan qayıdan və Ebola şübhəsi daşıyan şəxslərin karantinə alınması yerli bir epidemiya olaraq başlayan böhranın qlobal bir təhdidə çevrilmə potensialını nümayiş etdirir.
