İlk mRNA qrip peyvəndinə təsdiq yolu açıldı
Qrip virusunun mutasiyalarına qarşı çox daha sürətlə istehsal edilə bilən və koronavirus pandemiyasında özünü doğruladan mRNA texnologiyası indi də mövsümi qrip peyvəndi kimi istifadə edilməyə hazırlaşır.
AFN.az xəbər verir ki, Amerika Birləşmiş Ştatlarının Qida və Dərman Administrasiyasının (FDA) məsləhət şurası tibb dünyasında mühüm dönüş nöqtəsi olaraq xarakterizə edilən yeni bir qərara imza atıb.
Federal səhiyyə məsləhətçiləri "Moderna" şirkəti tərəfindən hazırlanan və "mFlusiva" adı verilən ilk mRNA əsaslı qrip peyvəndinin təsdiqlənməsini tövsiyə ediblər.
Qış mövsümündən əvvəl yaşlı əhalini qorumağı hədəfləyən peyvəndlə bağlı yekun qərarın avqust ayının əvvəlində veriləcəyi gözlənilir.
Nobel mükafatlı mRNA texnologiyası ilə istehsal olunan bu yeni peyvənd ənənəvi üsullarla müqayisədə çox daha sürətlə hazırlana bilir. Ekspertlər bu sürətin davamlı olaraq mutasiyaya uğrayan qrip virusuna qarşı operativ və effektiv dozaların hazırlanmasında böyük üstünlük təmin edəcəyini bildirirlər.
40 min insanın iştirakı ilə keçirilən klinik sınaqlarda "Moderna"nın mRNA peyvəndinin hazırkı rutin qrip peyvəndlərinə nəzərən qripə yoluxma hallarını təxminən 27 faiz daha çox azaltdığı müşahidə olunub.
Xüsusilə virusun peyvənd tərkibi ilə tam uyğunlaşmadığı dövrlərdə qeydə alınan ağır halların və xəstəxanaya yerləşdirmələrin bu texnologiya sayəsində ciddi şəkildə qarşısının alınması hədəflənir.
Qrip səbəbindən hər il on minlərlə insanın həyatını itirdiyi ABŞ-da yeni peyvəndin ilk növbədə ən həssas qrup olan yaşlı insanlarda istifadə edilməsi planlaşdırılır.
Şirkət peyvəndin 50-64 yaş qrupundakılar üçün tam təsdiq almasını, 65 və daha yuxarı yaşda olanlar üçün isə əlavə sınaqlar davam edərkən təcili istifadə icazəsinin verilməsini tələb edib.
FDA şurası peyvəndin təmin etdiyi faydaların mümkün risklərdən qat-qat çox olduğunu yekdilliklə qəbul edərkən, mütəxəssislər xüsusilə yaşlı insanlarda yaranan güclü immunitet cavabının ümidverici olduğunu vurğulayıblar.
Aparılan araşdırmalarda peyvəndlə bağlı hər hansı ciddi təhlükəsizlik problemi aşkar edilməyib. İynə vurulan nahiyədə ağrı, qızdırma, baş ağrısı və halsızlıq kimi müvəqqəti reaksiyaların mövcud qrip peyvəndlərinə görə bir qədər daha tez-tez müşahidə olunduğu bildirilib.
FDA rəsmiləri bu vəziyyətin mRNA peyvəndləri üçün tamamilə tipik olduğunu bildirərkən, ekspertlər bu müvəqqəti əlamətlərin immun sisteminin peyvəndə uğurla reaksiya verməsinin göstəricisi olduğunu ifadə ediblər.
Peyvənd təsdiqlənəcəyi təqdirdə "Moderna" 65 yaşdan yuxarı 400 min insanın qatılacağı iki illik genişmiqyaslı növbəti izləmə araşdırmasına başlayacaq.
