"Google" üç yeni süni intellekt modelini istifadəyə verib
"Google" ən güclü versiyası olan "Gemini 3.6 Flash" və kibertəhlükəsizlik sahəsi üçün xüsusi olaraq hazırlanan "Gemini 3.5 Flash Cyber" da daxil olmaqla üç yeni süni intellekt modelini təqdim edib.
Şirkət bu addımla proqram təminatlarındakı təhlükəsizlik boşluqlarını aşkar edə bilən sistemləri ilə seçilən "Anthropic" və "OpenAI" kimi rəqibləri ilə mübarizəsini gücləndirməyi hədəfləyir.
Süni intellekt reytinq siyahılarına əsasən, "Gemini 3.6 Flash" proqram kodlaşdırması və maliyyə əməliyyatlarında yüksək performans göstərən əvvəlki "Flash" versiyasının imkanlarını daha da irəliyə aparır.
Yeni modelin istifadəçilərə təqdim olunan qiymətinin də daha aşağı olduğu bildirilir.
"Google" "Gemini 3.5 Flash Cyber" modelinin isə təhlükəsizlik boşluqlarını aşkar etmə və aradan qaldırma proseslərini böyükmiqyaslı digər modellərlə müqayisədə daha aşağı xərclə həyata keçirdiyini bəyan edib.
Təqdim olunan üçüncü model olan "Gemini 3.5 Flash-Lite" isə rəqəmsal şəxsi köməkçi kimi çalışan muxtar süni intellekt agentlərinin idarə olunması kimi tapşırıqlar üçün nəzərdə tutulub.
"Gemini" Məhsul İdarəetməsi üzrə Baş Direktor Tulsi Doşi verdiyi açıqlamada yeni "Flash" modellərinin səmərəlilik ilə keyfiyyət arasında ən ideal balansı təmin etmək üçün qurulduğunu ifadə edib.
Şirkətin ən yüksək performanslı sistemi olması gözlənilən "Gemini 3.5 Pro" modeli üzərində işlər də davam edir.
"Google" may ayında verdiyi açıqlamada sözügedən modelin iyun ayında istifadəyə veriləcəyini bildirmişdi.
Modelin sınaq proseslərinin davam etdiyini qeyd edən şirkət, hazır olan kimi geniş kütlələrin istifadəsinə veriləcəyini elan edib.
Son aylarda "Anthropic", "OpenAI" və Çin startapları ilə yanaşı, "Meta"nın yayımladığı yeni modellər rəqabətdə önə çıxarkən, kibertəhlükəsizlik sahəsi süni intellekt sistemlərinin əsas fokus nöqtələrindən birinə çevrilib.
Süni intellekt modelləri proqramlardakı xətaları insanlardan çox daha sürətli aşkar edib düzəldə bildiyi halda, eyni zamanda kiberhücumlar təşkil etmək üçün də istifadə oluna bilir.
"Google" "Gemini 3.5 Flash Cyber" modelində də təhlükəsizlik yönümlü məhdud giriş yanaşmasının mənimsənildiyini açıqlayıb.
Şirkətin göstəricilərinə görə, model mürəkkəb açıq kodlu proqram təminatı olan "V8 jаvascript Engine" üzərində aparılan sınaqlarda 55 fərqli problem aşkar edib.
Bunların arasında daha əvvəl heç bir model tərəfindən tapılmayan 10 kritik təhlükəsizlik boşluğu yer alır.
Doşi modelin ilk mərhələdə yalnız hökumətlər və etibarlı tərəfdaşların istifadəsinə veriləcəyini bildirərək, bu sayədə müdafiə komandalarının kritik boşluqları bədniyyətli istifadələrdən əvvəl bağlamaq imkanı əldə edəcəyini qeyd edib.
Yeni "Flash" modellərinin əvvəlki versiyalara nəzərən 17 faiz daha az jeton işlətdiyi, bunun da proqram təminatçılarına eyni əməliyyatları daha az xərclə icra etmək imkanı yaradacağı bildirilib.
