Rusiya Mərkəzi Bankı faizi endirdi
Rusiya Mərkəzi Bankı uçot dərəcəsini 25 baza bəndi azaldaraq 14 faizə endirib.
AFN.az xəbər verir ki, bankın yaydığı bəyanatda iqtisadiyyatın ikinci rübdə ümumən mülayim artımını davam etdirdiyi, yay aylarında qiymət artımları və inflyasiya gözləntilərindəki yüksəlişin böyük ölçüdə müvəqqəti amillərdən qaynaqlandığı qeyd olunub.
Bəyanatda "Rusiya Mərkəzi Bankı uçot dərəcəsini 25 baza bəndi azaldaraq 14 faizə endirməyə qərar verib" ifadəsinə yer verilib. İqtisadiyyatın ikinci rübdə mülayim artımını sürdürdüyü vurğulanan açıqlamada artımın əsasən istehlak tələbindən qaynaqlandığı, ilin ikinci yarısında istehlak artımının zəifləyə biləcəyi və 2026-cı il üzrə artım proqnozunun 0-1 faiz aralığına endirildiyi bildirilib. Açıqlamada bankın növbəti iclaslarda faiz qərarlarını inflyasiya, inflyasiya gözləntiləri, eləcə də daxili və xarici şəraitdən irəli gələn risklərin dinamikasına uyğun olaraq qəbul edəcəyi vurğulanıb.
Mövcud pul-kredit siyasəti çərçivəsində illik inflyasiyanın 2026-cı ilin sonunda 6-7 faiz aralığında reallaşacağının gözlənildiyi bildirilən açıqlamada 2027-ci ildən etibarən inflyasiyanın hədəf səviyyəsinə qayıtmasının nəzərdə tutulduğu ifadə edilib. Bəyanatda ev təsərrüfatlarının, şirkətlərin və maliyyə bazarı iştirakçılarının inflyasiya gözləntilərinin artdığı, yüksək gözləntilərin inflyasiyada dayanıqlı zəifləməni çətinləşdirə biləcəyi diqqətə çatdırılıb.
Əmək bazarındakı gərginliyin tədricən azaldığı, işsizliyin tarixi minimum səviyyələrdə qalmaqda davam etdiyi qeyd edilən açıqlamada əməkhaqqı artımının zəifləməsinə baxmayaraq məhsuldarlıq artımından yüksək seyr etməyi sürdürdüyü də əlavə olunub.
Mərkəzi Bank 2025-ci ilin iyununda 2022-ci ilin sentyabrından bəri ilk dəfə faiz endirimi edərək dərəcəni 21 faizdən 20 faizə salmış, sonrakı endirimlərlə uçot dərəcəsini 2025-ci ilin sonunda 15,5 faizə, 2026-cı ilin martında 15 faizə və keçən ay 14,25 faizə endirmişdi.
