Brent neftinin qiyməti 94,07 dollara düşüb
Dünən 104,96 dollaradək yüksələn Brent markalı neftin yanvar fyuçerslərinin bir barelinin qiyməti günü 94,62 dollarla başa vurub.
AFN.az xəbər verir ki, Brent neftinin bir barelinin qiyməti bu gün saat 10:35-ə olan məlumata görə, əvvəlki bağlanışla müqayisədə təxminən 0,6 faiz azalaraq 94,07 dollara düşüb.
Eyni vaxtda Qərbi Texas markalı (WTI) xam neftin dekabr fyuçerslərinin bir barelinin qiyməti 87,06 dollar olub.
Neft qiymətlərinin azalmasına ABŞ-da keçirilən aralıq seçkilərin İran müharibəsində diplomatik həll ehtimalını gücləndirə biləcəyi ilə bağlı gözləntilər təsir göstərib.
Hadisələr bazarlarda geosiyasi risk mükafatını azaldarkən, investorlar ABŞ-İran gərginliyinin yenidən artması ehtimalını da nəzərdən qaçırmırlar. Analitiklər Hörmüz boğazından daşımaların bərpasının qlobal bazarı yenidən təklif artıqlığı vəziyyətinə gətirdiyini, lakin mövcud geosiyasi risklərin qiymətlərin yüksəlməsi ehtimalını qoruduğunu bildirirlər.
ABŞ-ın kommersiya xam neft ehtiyatlarında qeydə alınan azalma isə tələbatın yüksək olduğu barədə təsəvvür yaradaraq qiymətlərin enməsini məhdudlaşdırır.
ABŞ Enerji İnformasiya Administrasiyası (EIA) ölkədəki kommersiya xam neft ehtiyatlarının ötən həftə təxminən 900 min barel azalaraq 409 milyon 800 min barelə düşdüyünü açıqlayıb. Bazarın gözləntisi ehtiyatların təxminən 1 milyon 700 min barel azalacağı istiqamətində idi.
Ölkənin kommersiya xam neft ehtiyatlarına daxil edilməyən strateji xam neft ehtiyatları isə 400 min barel azalaraq 282 milyon 200 min barelə düşüb.
Bu dövrdə ABŞ-ın benzin ehtiyatları 200 min barel azalaraq 209 milyon barel təşkil edib.
Brent neftində texniki baxımdan 102,47 dollar müqavimət, 89,61 dollar isə dəstək səviyyəsi kimi izlənilə bilər.
