Avropada günəş tutulması böyük maraqla izlənildi
Avropanın bir çox ölkəsində müşahidə edilən günəş tutulmasını izləmək istəyənlər parklarda, meydanlarda, rəsədxanalarda və yüksək nöqtələrdə bir araya gəlib.
AFN.az xəbər verir ki, İspaniyanın şimalındakı bəzi bölgələrdə tam günəş tutulması müşahidə edilərkən, İngiltərənin böyük hissəsində Günəşin 90 faizindən çoxu Ay tərəfindən örtülüb.
Avropa üzrə tutulmanı izləmək istəyənlər Günəşə təhlükəsiz şəkildə baxmaq üçün xüsusi filtrlı eynəklərdən və teleskoplardan istifadə ediblər.
İngiltərənin paytaxtı Londonda günəş tutulması yerli vaxtla saat 18:17-də başlayıb və 19:13-də ən yüksək səviyyəyə çatıb.
Ölkədə tutulmanın ən yüksək səviyyəyə çatdığı vaxt yerləşilən bölgədən asılı olaraq 19:02 ilə 19:16 arasında dəyişib.
Paytaxtda tutulmanı izləmək üçün ən uyğun məkanlar arasında Kral Rəsədxanasının yerləşdiyi Qrinviç Parkı, London mənzərəsi ilə tanınan Teleqraf təpəsi, Regent Parkının şimalındakı Primrose Hill, Hampstead Heath ərazisində yerləşən və şəhərin ən yüksək təbii nöqtələrindən biri olan Parliament Hill və yüksək mövqeyi sayəsində qərb istiqamətində açıq görüntü təqdim edən Crystal Palace yer alıb.
Açıq ərazilər və yüksək nöqtələr, xüsusilə Günəşin qərb istiqamətində aşağı düşdüyü saatlarda daha geniş görüntü imkanı təqdim edib.
Həmçinin çox sayda insan paytaxtın mərkəzindəki Parlament Meydanında və məşhur Trafalqar Meydanında günəş tutulmasını izləyib.
İspaniyanın şimal-qərbindən başlayaraq şərqə doğru irəliləyən tam tutulma ölkənin şimalındakı bəzi bölgələrdə və Balear adalarında müşahidə edilib.
Ölkədə günəş tutulmasının qismən mərhələsi yerli vaxtla təxminən 19:30-da başlayıb, tam tutulma isə bölgədən asılı olaraq təxminən 20:27 ilə 20:33 arasında baş verib. Tam tutulma bəzi bölgələrdə iki dəqiqəyə yaxın müddət ərzində izlənilib.
Gijon, Santander və Bilbao kimi şimal şəhərlərində tam tutulma müşahidə edilərkən, paytaxt Madriddə Günəşin təxminən 99 faizi Ay tərəfindən örtülüb. Madriddə tutulma yerli vaxtla təxminən 20:32-də ən yüksək səviyyəyə çatıb.
Tutulmanın Günəşin qərb istiqamətində üfüqə yaxınlaşdığı saatlarda baş verməsi səbəbindən xüsusilə qərbə doğru açıq görüntü təqdim edən yüksək nöqtələr müşahidə üçün seçilib.
İspaniyada nadir səma hadisəsinə böyük maraq göstərilib və çox sayda insan tutulmanı xüsusi filtrlı eynəklərlə izləyib.
İber yarımadasında sonuncu dəfə 1912-ci ildə tam günəş tutulması müşahidə edilmişdi. İspaniyada 2 avqust 2027-ci ildə daha bir tam günəş tutulmasının görüləcəyi gözlənilir.
Fransada günəş tutulması xüsusilə ölkənin cənub-qərbində daha aydın müşahidə olunub.
Paytaxt Parisdə Günəşin 92 faizi Ay tərəfindən örtülərkən, bu göstərici ölkənin cənub-qərbindəki Saint-Jean-de-Luz şəhərində 99,6 faizə çatıb. Parisdə yerli vaxtla 19:22-də başlayan günəş tutulması saat 21:10 radələrində başa çatıb.
Paytaxtda günəş tutulmasını izləmək istəyənlər Citroen Parkı, Lüksemburq bağçası və Paris Filarmoniya Salonunun damı kimi məkanlarda toplaşıblar.
Bu unikal təcrübəni yaşamaq üçün şəhər sakinləri tarixi məkanlara da üstünlük veriblər. Parisdə mənzərəsi ilə məşhur tarixi Sacre-Coeur Bazilikasının qarşısında toplaşan və məşhur Şanzelize prospektindəki Zəfər Tağına çıxanlar da olub.
Sonuncu dəfə 1999-cu ildə günəş tutulmasının görüldüyü Fransada qoruyucu eynək ehtiyatlarının günlər əvvəl tükənməsi səbəbindən bəzi satış məntəqələrinin qarşısında son 24 saat ərzində növbələr yaranıb.
Belçikada da xalq günəş tutulmasını izləmək üçün xüsusi filtrlı eynək almaq məqsədilə satış məntəqələrinə axın edib və mağazaların qarşısında uzun növbələr yaranıb. Ölkədə tutulma yerli vaxtla 19:18-də başlayıb.
Bəzi belçikalılar tam tutulmanın yaşanacağı İspaniya və İslandiyaya səfər edərkən, bəziləri isə ölkədəki meydanlarda bu ana şahidlik etməyə üstünlük veriblər.
Paytaxt Brüsseldə Ellinci İl Parkında (Parc du Cinquantenaire) yerləşən tarixi Zəfər Tağı kompleksi tutulmanı izləmək istəyənlərin üzünə qapılarını açıb. Kompleksə cavabdeh olan Belçika Kral Hərbi Muzeyinin yerli vaxtla saat 09:00-da satışa çıxardığı biletlər bir neçə dəqiqə ərzində tükənib.
Brüsseldə maraq göstərənlər Grimbergen bölgəsindəki MIRA Rəsədxanası, Zavelenberq təbiət ərazisi, Scheutbos Parkı və Koekelberq Bazilikası kimi hündür binaların tutulmanı izləməyə mane olmadığı məkanları doldurublar.
Antverpen şəhərində də MAS Muzeyinin damında tutulmanı izləmək üçün çoxsaylı insanların iştirakı ilə tədbir keçirilib. Tədbirdə insanlar damda hazır vəziyyətdə olan günəş teleskoplarından istifadə edərək tutulmanı canlı izləyiblər.
İsveçrədə 1999-cu ildən bəri müşahidə edilən ən böyük qismən günəş tutulması axşam saatlarında baş verib.
Ölkə üzrə günəş tutulması yerli vaxtla təxminən 19:25-də başlayıb, təxminən bir saat sonra isə ən təsirli mərhələsinə keçib və Ay Günəşin 91-93 faizini örtüb.
Cenevrədəki müşahidəçilər maksimum tutulma anında Günəşin təxminən 93 faizinin Ay tərəfindən örtüldüyü dərin qismən tutulmaya şahidlik ediblər.
19:26-da başlayan günəş tutulması təxminən 20:20-də ən yüksək nöqtəsinə çatıb və gün batımından qısa müddət əvvəl başa çatıb.
Tutulma gün batımından qısa müddət əvvəl ən yüksək səviyyəsinə çatdıqdan sonra Günəş qismən tutulmuş vəziyyətdə üfüqdə itib.
Ölkədə nadir hadisəyə böyük maraq göstərilib, tutulmanı izləmək üçün eynək satan bəzi mağazalarda sıxlıq yaşanıb.
Paytaxt Bern şəhərində yüzlərlə insanın günəş tutulmasını təhlükəsiz şəkildə izləyə bilmək üçün xüsusi eynək almaq məqsədilə mağazaların qarşısında gözlədiyi bildirilib.
Avstriyada da Ay Günəşin 89 faizini örtüb.
Paytaxt Vyanada yerli vaxtla 19:22-də başlayan və 1999-cu ildən bəri şəhərdə müşahidə edilən ən güclü qismən günəş tutulması saat 20:13-də ən yüksək səviyyəsinə çatıb. Günəşin yerli vaxtla 20:14-də batması səbəbindən tutulmanın ən yüksək səviyyəyə çatdığı an gün batımından cəmi bir dəqiqə əvvəl yaşanıb.
Tutulmanı müşahidə etmək istəyənlər üçün xüsusilə qərb istiqamətində görüntünün açıq olduğu məkanlara üstünlük verilib. Şəhərin yüksək hissələrindəki Steinhofgründe, Kahlenberg və Cobenzl bölgələri əsas müşahidə nöqtələri arasında yer alıb.
Vyana Xalq Təhsil Mərkəzlərinin (VHS) Planetariumunda da tutulma ilə əlaqədar şəhərdə birgə müşahidə tədbirləri təşkil edilib.
Şəhərin simvolik tikililərindən olan Dunay qülləsinin 150 metr hündürlükdə yerləşən müşahidə terrası da günəş tutulmasını izləmək istəyənlərin üstünlük verdiyi məkanlardan biri olub.
İsveçdə yerli vaxtla təxminən 19:56-da başlayan və təxminən 10 dəqiqə davam edən günəş tutulması ölkənin böyük hissəsində müşahidə edilib.
Paytaxt Stokholmda Drottningatan bölgəsində tarixi hadisəyə şahidlik etmək istəyən onlarla insan xüsusi eynəklərlə günəş tutulmasını izləyib.
İsveçdə sonuncu dəfə 1954-cü ildə tam günəş tutulması baş verib, növbəti tam tutulmanın isə 2126-cı ildə reallaşacağı gözlənilir.
Almaniyanın bir çox şəhərində günəş tutulmasını izləmək istəyənlər tarixi məkanlara, açıq ərazilərə və parklara axın ediblər.
Günəş tutulması xüsusilə ölkənin cənub-qərbində daha aydın müşahidə olunub.
Paytaxt Berlində Günəşin 85 faizi Ay tərəfindən örtülərkən, bu göstərici ölkənin cənub-qərbindəki Freiburg şəhərində 90 faizə çatıb.
Almaniyada yerli vaxtla 19:12-də başlayan günəş tutulması 20:05-də ən yüksək səviyyəsinə çatıb.
Paytaxtda günəş tutulmasını izləmək istəyənlər Tempelhofer Feld və Brandenburq qapısı kimi məkanlarda bir araya gəliblər.
Açıq ərazilər və yüksək nöqtələr, xüsusilə Günəşin qərb istiqamətində aşağı düşdüyü saatlarda daha geniş görüntü imkanı təqdim edib.
Sonuncu dəfə 1999-cu ildə günəş tutulmasının görüldüyü Almaniyada qoruyucu eynək ehtiyatlarının günlər əvvəl tükəndiyi bildirilib.
İslandiyada 1954-cü ildən bəri ölkədə müşahidə edilən ilk tam günəş tutulması baş verib.
Tutulma ölkənin qərbindəki Westfjords, Snaefellsnes yarımadası və paytaxt Reykyavikin də yerləşdiyi bölgələrdə tam şəkildə müşahidə edilib.
Reykyavikdə günəş tutulması yerli vaxtla 16:47-də başlayıb, tam tutulma isə 17:48-də başlayaraq təxminən bir dəqiqə davam edib. İslandiyanın qərbindəki bəzi bölgələrdə tam tutulmanın müddəti 2 dəqiqəni keçib.
Tutulmanı izləmək üçün ölkəyə çox sayda ziyarətçi gəlib, xüsusi filtrlı eynəklərin qısa müddət ərzində tükəndiyi bildirilib.
