Çox isti içkilər xərçəng riskini artırır
İsti çay və qəhvə kimi içkilərin müntəzəm olaraq çox yüksək temperaturda istehlak edilməsi qida borusu xərçəngi riskini artırır.
AFN.az xəbər verir ki, mütəxəssislər içkinin təhlükəsiz temperatura çatması üçün içilməzdən əvvəl bir neçə dəqiqə gözlənilməsini tövsiyə edirlər.
İngiltərədə təxminən bir milyon insanın iştirakı ilə aparılan araşdırma isti içkilərlə qida borusu xərçəngi arasındakı əlaqəni ortaya qoyan ən genişmiqyaslı tədqiqat kimi diqqət çəkib.
Araşdırmada içkilərini çox isti qəbul edən şəxslərin ılıq içənlərlə müqayisədə sözügedən xərçəngə tutulma riskinin təxminən üç dəfə daha yüksək olduğu bildirilir.
Mütəxəssislər riskə baxmayaraq, ümumi xərçəngə tutulma göstəricisinin aşağı olaraq qaldığını vurğulayırlar. Mədəyə çatmazdan əvvəl qida borusundan keçən qaynar mayelərin hüceyrə təbəqəsinə zərər verdiyi bildirilir.
Oksford Universiteti tərəfindən aparılan və “International Journal of Cancer” jurnalında dərc edilən araşdırmada 65 dərəcə və daha yüksək temperaturda olan bütün içkilər çox isti kimi müəyyən edilir və potensial risk daşıdığı bildirilir.
Orta yaşlı 977282 qadın və kişinin məlumatlarına əsaslanan araşdırmaya görə, gündə altı və ya daha çox isti içki qəbul etmək də riski artırır.
Süd əlavə etməyin içkiləri müəyyən qədər soyuda biləcəyi, lakin südlü çay və ya qəhvənin yenə də çox isti qala biləcəyi bildirilir.
Təzə qaynadılmış su ilə hazırlanan çayın temperaturu qaynama nöqtəsi olan 100 dərəcəyə yaxın olur.
Fincana töküldükdə isə bu temperatur 90-95 dərəcəyə düşür. Mütəxəssislər içkinin təhlükəsiz temperatura çatması üçün içilməzdən əvvəl bir neçə dəqiqə gözlənilməsini tövsiyə edirlər.
İngiltərə Xərçəng Araşdırmaları İnstitutundan Fiona Osgun qida borusu xərçəngi riskini azaltmağın ən vacib yolunun siqareti tərgitmək və alkoqol istehlakını azaltmaq olduğunu vurğulayır. İsti içkilərin yaratdığı risklə yanaşı, siqaret və alkoqolun daha böyük risk faktoru olduğu bildirilir.
Qida borusu xərçənginin əlamətləri arasında döş qəfəsində və ya boğazda ağrı, həzmsizlik, mədə yanması və çəki itkisi yer alır.
