BDYPİ-dən hava şəraiti ilə əlaqədar XƏBƏRDARLIQ
Sentyabrın 21-də ölkənin bəzi dağlıq və dağətəyi rayonlarında yağışın ayrı-ayrı yerlərdə leysan xarakterli intensiv olacağı, şimşək çaxacağı, dolu düşəcəyi, gecə və səhər saatlarında isə dağlıq ərazilərdə duman müşahidə ediləcəyi proqnozlaşdırılır.
AFN.az xəbər verir ki, bu barədə Baş Dövlət Yol Polisi İdarəsi gözlənilən hava şəraiti ilə əlaqədar xəbərdarlığında əksini tapıb. İdarə sürücülərə xüsusilə diqqətli olmağı tövsiyə edib. Bildirilib ki, yağıntı zamanı yol örtüyünün sürüşkənləşməsi, görünüş məsafəsinin azalması və dağlıq ərazilərdə duman hərəkət təhlükəsizliyinə ciddi təsir göstərə bilər.
"Sürücülərdən sürət həddini hava və yol şəraitinə uyğun seçmək, ara məsafəsini artırmaq, kəskin manevr və ani tormozlamadan çəkinmək, xarici işıq cihazlarından düzgün istifadə etmək, eləcə də səfər öncəsi avtomobilin texniki vəziyyətinə, xüsusilə şinlərə və şüşəsilənlərin sazlığına diqqət yetirmək xahiş olunur" - deyə BDYPİ-nin yaydığı mətndə vurğulanıb.
