Litvada yeni ABŞ hərbçilərinin yerləşdirilməsi başlayır
Litva Prezidenti Gitanas Nauseda ölkəsində yerləşdiriləcək yeni ABŞ hərbçilərinin yola düşdüyünü bildirib.
AFN.az xəbər verir ki, Nauseda sosial media hesabında ABŞ-dan yeni hərbçilərin Litvaya doğru yola çıxdığı barədə təsdiq aldığını açıqlayıb.
Nauseda bu qərara görə ABŞ-a təşəkkür edib və addımın yalnız Litvanın deyil, bütün regionun təhlükəsizliyi baxımından əhəmiyyətli olduğunu vurğulayıb.
O bildirib ki, ABŞ-ın Litvadakı hərbi mövcudluğu çəkindirmə imkanlarının və kollektiv müdafiənin mühüm hissəsidir. Nauseda müttəfiqlərin Litva ilə birlikdə olmaq əzminin NATO-nun ərazisinin hər qarışını müdafiə etməyə hazır olduğuna dair açıq mesaj verdiyini qeyd edib.
Litva prezidenti ölkədə yerləşdiriləcək ABŞ hərbçilərinin sayının hələ dəqiq müəyyənləşmədiyini bildirib. Onun sözlərinə görə, bu say əvvəlkindən az olmayacaq.
Litvada xidmət edən 1000-dən çox ABŞ hərbçisi iyunun əvvəlində xidmət müddətinin başa çatması ilə əlaqədar ölkədən çıxmağa başlamışdı.
Litva rəsmiləri həmin hərbçilərin yerini yeni birliyin tutmasının gözlənildiyini bildirmişdilər. Lakin ABŞ-ın Avropadakı hərbi mövcudluğunu yenidən nəzərdən keçirməsi səbəbindən yeni yerləşdirmənin vaxtı və miqyası hələ dəqiqləşdirilməmişdi.
