Cənubi Afrikada qadın meyitlərinin sayı 11-ə çatıb
Cənubi Afrikanın Qautenq əyalətində, Yohannesburqun şərqində yerləşən Ekurhuleni bölgəsində iyul ayından bəri aşkarlanan qadın meyitlərinin sayı 11-ə yüksəlib.
AFN.az xəbər verir ki, Cənubi Afrika Polis Xidmətinin (SAPS) açıqlamasına görə, Ekurhuleninin Sprinqs bölgəsində Rokana yolu yaxınlığındakı açıq ərazidə bir qadının meyiti tapılıb.
Bölgədə patrul xidməti aparan özəl mühafizə əməkdaşlarının meyiti aşkarlamasından sonra polis hadisə yerinə cəlb olunub.
Qautenq əyalətinin polis komissarı general-leytenant Tommi Mthombeni ilkin araşdırmalara əsasən, 20 yaşlarının əvvəlində olduğu təxmin edilən qadının qısa müddət əvvəl öldürüldüyünü bildirib.
Mthombeni sentyabrın 26-da Tembisa bölgəsindəki Muifonteyn qəbiristanlığında meyiti tapılan Ntombifuti Nksumalunun qətli ilə əlaqəli şübhəlinin Limpopo əyalətində saxlanıldığını da açıqlayıb.
Son hadisə ilə birlikdə iyul ayından etibarən Ekurhuleni bölgəsində aşkarlanan qadın meyitlərinin sayı 11-ə çatıb.
Bundan əvvəl sentyabrın 17-də Dawn Park bölgəsində meyiti tapılan Jabulile Ntimbanın qətli ilə bağlı iki qadın saxlanılmışdı.
Qətllər ölkə üzrə qadınlara qarşı zorakılığa etiraz aksiyalarının keçirilməsinə səbəb olub.
Yerli mediada qətllərin seriyalı qatil tərəfindən törədilə biləcəyi ehtimalı gündəmə gətirilib. Polis isə hadisələr arasında əlaqənin olub-olmadığını araşdırır.
