İtaliya İspaniyadan gələnlərə sərhəd nəzarətini daha 15 gün uzatdı
İtaliyanın 30-31 iyul tarixlərində təxminən 70 min qeyri-qanuni miqrantın Mərakeşdən İspaniyanın Şimali Afrikadakı ərazisi Seutaya keçməsi səbəbilə bu ölkədən gələnlərə tətbiq etdiyi sərhəd nəzarətini daha 15 gün uzatdığı bildirilib.
AFN.az xəbər verir ki, Roma hökuməti hava və dəniz sərhədlərində tətbiq olunan nəzarətin müddətini yenidən artırıb.
Roma ilə Madrid arasında diplomatik böhrana da səbəb olan və İtaliyanın Seutaya miqrant axını ilə əlaqədar avqust ayında başladığı İspaniyadan dəniz və hava yolu ilə səyahət edən şəxslərin sərhəd nəzarətinə cəlb edilməsi tətbiqi Roma tərəfindən bir daha uzadılıb.
İtaliyanın ANSA agentliyinin məlumatına görə, daxili işlər naziri Matteo Piantedosi səhər saatlarında Miqrasiya və Sərhəd Təhlükəsizliyi Analiz Komitəsi ilə məsləhətləşdikdən sonra hava və dəniz sərhədlərində nəzarəti daha 15 gün uzatmaq qərarına gəlib.
Sözügedən qərarın İspaniyanın Seuta şəhərində mövcud vəziyyətin və xüsusilə daha əvvəl müəyyən edilmiş kritik problemlərin davam etməsinə əsaslandığı, qərar barədə Avropa İttifaqı (Aİ) Komissiyasının və Aİ üzvü olan ölkələrin də məlumatlandırıldığı bildirilib.
İspaniyanın Şimali Afrikadakı Seuta şəhərinə Mərakeşin Fnidek şəhərinin sahillərindən 30 və 31 iyul tarixlərində təxminən 70 min qeyri-qanuni miqrant üzərək keçib.
İspaniya hökuməti Seutaya qeyri-qanuni miqrasiya cəhdlərinin artmasından sonra təhlükəsizliyin təmin edilməsi məqsədilə silahlı qüvvələrin bölgəyə yerləşdirilməsinə qərar verib.
Mərakeşdən İspaniyaya keçməyə çalışarkən həyatını itirən qeyri-qanuni miqrantların sayının 88 olduğu açıqlanıb.
Seutaya qeyri-qanuni miqrant axını səbəbilə İtaliya avqustun 1-dən etibarən quru sərhədi olmayan İspaniya ilə sərbəst hərəkəti dayandırıb və dəniz və hava yolu ilə səyahət edən şəxslər üçün sərhəd nəzarətinə başlayıb.
İtaliyanın bu qərarı İspaniyanın narazılığına səbəb olub. Madrid hökuməti də oxşar müddət ərzində qarşılıq verəcəyini və İtaliyadan İspaniyaya dəniz və hava yolu ilə gələn sərnişinlərin sərhəd nəzarətinə cəlb ediləcəyini açıqlayıb.
Son olaraq Romanın sentyabrın 15-də sərhəd nəzarətinin müddətini uzatmaq qərarına cavab olaraq Madrid hökuməti də İtaliyadan gələn şəxslərin oktyabrın 8-dək sərhəd nəzarətinə cəlb ediləcəyini bildirib.
