WhatsApp gənclər üçün yeni valideyn nəzarəti imkanları təqdim edir
WhatsApp uşaqların platformada yaşlarına daha uyğun təcrübə yaşaması ilə bağlı artan təzyiqlər fonunda gənc istifadəçilər üçün yeni valideyn nəzarəti imkanları təqdim etməyə hazırlaşır.
AFN.az xəbər verir ki, sosial mesajlaşma tətbiqinin yeni alətləri valideynlərə uşaqlarının qrupa qoşulması və ya qrupdan ayrılması barədə məlumat almaq kimi müxtəlif seçimlər təqdim edir. Bu xüsusiyyət həmçinin hesab üçün məxfilik parametrlərinin müəyyənləşdirilməsinə imkan verir.
Şirkətin açıqlamasında valideynlərin gənclərin göndərdiyi və qəbul etdiyi mesajları görmək səlahiyyətinə malik olmayacağı bildirilib. Zənglərlə yanaşı mesajlar da gizli qalmağa davam edəcək və uçdan-uca şifrələmə ilə qorunacaq.
Nəzarət imkanlarının könüllü olması isə açıq zəiflik kimi qiymətləndirilir. Mütəxəssislər bu addımın Meta üçün olduqca əlverişli olduğunu, çünki məsuliyyətin bir hissəsinin valideynlərin və gənclərin üzərinə qoyulması ilə yaşın yoxlanılmasından asılılığın azaldıldığını bildirirlər.
Böyük Britaniyada WhatsApp-dan istifadə üçün minimum yaş həddi 13 olaraq tətbiq edilir, bəzi ölkələrdə isə bu hədd daha yüksəkdir.
Şirkətin məlumatına görə, valideynlər nəzarət imkanlarını istədikləri vaxt qura və ya tamamilə söndürə biləcəklər. Parametrlər valideyn tərəfindən müəyyən edilən və gənclərin nəzarət imkanlarını söndürmək istədikdə daxil etməli olduqları PIN kodundan istifadə edilməklə asanlıqla qurula biləcək.
Yeni məxfilik alətləri arasında uşağın profil şəklini kimin görə biləcəyini və kimlərin onu qruplara əlavə edə biləcəyini seçmək imkanları yer alır.
Valideynlər həmçinin gənclərin təşkilatların və ictimai xadimlərin məzmun paylaşmasına imkan verən Kanallardan necə istifadə edəcəyini də müəyyənləşdirə biləcəklər.
Tətbiqin könüllü süni intellekt köməkçisi Meta AI üçün standart olaraq 13 yaşdan yuxarı istifadəçilər üçün nəzərdə tutulan parametr ilə daha sərt məzmun məhdudlaşdırma seçimi arasında seçim etmək mümkün olacaq.
Şirkət bütün bu nəzarət imkanlarının valideynlər və gənclər arasında WhatsApp-dan necə istifadə olunacağı ilə bağlı açıq söhbətləri dəstəkləmək məqsədilə hazırlandığını bildirib.
Bu dəyişikliklər hökumətlər və tənzimləyici qurumların texnologiya şirkətlərinin uşaqları platformalarında qorumaq üçün fəaliyyət üsullarını dəyişdirməsinə yönəlmiş təzyiqləri artırdığı bir dövrdə həyata keçirilir.
İyun ayında hökumət 16 yaşdan aşağı şəxslərin sosial media platformalarından istifadəsinin qadağan edilməsini planlaşdırdığını açıqlamışdı. Bu məhdudiyyətlərin 2027-ci ilin martında qüvvəyə minməsi gözlənilir.
Sosial mediadan istifadə edənlərin yaşının müəyyənləşdirilməsi üçün yüksək effektiv yaş yoxlama tədbirlərindən istifadə ediləcəyi bildirilsə də, WhatsApp hökumət tərəfindən mesajlaşma xidməti kimi qəbul edildiyi üçün mövcud qadağanın əhatə dairəsindən kənarda saxlanılır.
