Alimlər okeanların vəziyyəti ilə bağlı indiyədək ən sərt xəbərdarlığı ediblər
Okeanlar insan fəaliyyətinin yaratdığı artıq istiliyin təxminən 90 faizini udaraq narahatedici sürətlə istiləşir. Beynəlxalq miqyasda 100-dən çox alimin imzasını daşıyan onuncu Kopernik Okeanların Vəziyyəti Hesabatında dəniz temperaturunun 20 il ərzində iki dəfə artdığı, 2023, 2024 və 2026-cı illərdə rekord səviyyələrə çatdığı ortaya qoyulub.
AFN.az xəbər verir ki, ötən il okeanların 23 zettacoul istilik udaraq ardıcıl doqquzuncu dəfə rekord qırdığı bildirilib və bu enerji miqdarının saniyədə partlayan 12 Xirosima bombasının gücünə bərabər olduğu qeyd edilib.
İstiləşən suların dəniz səviyyəsini ildə orta hesabla 3,8 millimetr artırdığı və sahilyanı ərazilərdə yaşayan yüz milyonlarla insan üçün təhlükə yaratdığı vurğulanır.
Həmçinin okeanların karbon çirklənməsini udması nəticəsində 1985-ci ildən bəri 17 faiz daha turşulu hala gəldiyi, Aralıq dənizi və Qara dəniz kimi Avropa dənizlərinin rekord səviyyələrdə dəniz istilik dalğaları ilə üzləşdiyi bildirilib.
Alimlər qlobal iqlim böhranının səbəb olduğu bu köklü dəyişikliklərə qarşı hökumətlərin və icmaların təcili şəkildə hazırlıq görməli olduğu barədə xəbərdarlıq edirlər.
