"Qalatasaray" qələbə rekordunu yenilədi, "Fənərbağça" yenə ikinci oldu
"Qalatasaray" Türkiyə Super Liqasının 9-cu turunda "Fənərbağça"nı 2:1 hesabı ilə məğlub edərək çempionat tarixində ən çox qələbə qazanan komanda olub.
AFN.az xəbər verir ki, doğma meydanda əldə edilən bu nəticə ilə İstanbul təmsilçisi liqadakı 1315-ci qələbəsini qazanaraq bu göstəricidə əzəli rəqibini geridə qoyub.
"Qalatasaray" dünən "Fənərbağça" üzərində qazandığı qələbə sayəsində Super Liqanın bütün dövrlər üzrə xal cədvəlində rəqibi ilə arasındakı fərqi 18 xala endirib.
"Fənərbağça"nı məğlub etdikdən sonra "Qalatasaray" bütün dövrlər üzrə xal cədvəlində 4036 xala çatıb.
Bu göstəricidə ikinci yerdə olan "Qalatasaray" 1959-cu ildən indiyədək Super Liqada 4054 xal toplamış "Fənərbağça"dan 18 xal geri qalır.
Okan Buruk komandanın baş məşqçisi olduqdan sonra "Qalatasaray" Super Liqa tarixində ən çox qələbə qazanan komanda mövqeyinə yüksəlib.
Burukun komandaya rəhbərlik etməyə başladığı 2022-2023 mövsümündən əvvəl çempionat tarixində "Qalatasaray"ın 1193, "Fənərbağça"nın isə 1206 qələbəsi var idi.
Burukun rəhbərliyi altında "Qalatasaray" Super Liqanı 2022-2023 mövsümündə 28, 2023-2024 mövsümündə 33, 2024-2025 mövsümündə 30, 2025-2026 mövsümündə isə 24 qələbə ilə başa vurub.
Bu mövsüm çempionatda 7 qələbə qazanan Burukun "Qalatasaray"ı 2022-2023 mövsümündən bəri bu turnirdə ümumilikdə 122 qələbə əldə edib.
"Qalatasaray" 1959-cu ildən indiyədək Super Liqada ən çox qol vuran ikinci komanda olub.
Çempionat tarixində keçirilən 2275 matçda rəqib qapılarına 4085 qol vuran sarı-qırmızılılar bu göstəricidə 4134 qola imza atan "Fənərbağça"dan sonra ikinci yerdə qərarlaşıb.
Super Liqa tarixində "Qalatasaray" 676 həftə ilə liderlik kürsüsündə ən çox yer alan komandadır.
Çempionat tarixində liderlik həftələrinin sayına görə "Fənərbağça" 588 həftə ilə ikinci, "Beşiktaş" 440 həftə ilə üçüncü, "Trabzonspor" isə 240 həftə ilə dördüncü yerdədir.
Sarı-qırmızılı komanda bu mövsümün 9 turundan 6-sını lider kimi başa vurub.
"Qalatasaray" Super Liqada ən çox çempionluq qazanan komanda titulunu qoruyur.
Liqa mövsümünü 26 dəfə zirvədə tamamlayan sarı-qırmızılılar ən yaxın rəqibi "Fənərbağça"nı (19) 7 çempionluq qabaqlayır. "Beşiktaş" 16 çempionluqla üçüncü, "Trabzonspor" isə 7 çempionluqla dördüncü yerdədir.
"Bursaspor" və "İstanbul Başakşehir" komandalarının hər biri bir dəfə çempion olub.
