Daşınmaz dövlət əmlakının idarəçiliyində daha bir yenilik: qeydiyyat vərəqəsinin qəbulu elektronlaşdırıldı
Əmlak Məsələləri Dövlət Komitəsi ənənəsinə sadiq qalaraq daha bir yeniliyə imza atdı. Artıq dövlət müəssisələri əmlakın qeydiyyat vərəqəsinin tərtibini, təsdiqi və göndərilməsini elektron qaydada yerinə yetirə bilər. Belə ki, “Daşınmaz dövlət əmlakının qeydiyyat vərəqəsinin elektron qəbulu” adlı xidmət vasitəsilə hesabatlar Komitə tərəfindən elektron formada qəbul olunur, ərazi idarələrinə göndərilir və yekun hesabat registr bazasına yerləşdirilir.
“Daşınmaz dövlət əmlakının qeydiyyat vərəqəsinin elektron qəbulu” xidməti dövlət müəssisələri və komitə arasında elektron əlaqələrin yaradılmasına, şəffaflığın artırılmasına, vətəndaş-məmur ünsiyyətinin minimuma endirilməsinə şərait yaradır. Bundan başqa onlayn formada qəbul qeydiyyat vərəqələrinin elektron arxivinin təşkilini təmin edir.
Yeni yaradılan xidmətdən istifadə rahat və sürətlidir. Belə ki, dövlət müəssisələrinə dair qeydiyyat vərəqəsinin elektron formada göndərilməsi üçün Əmlak Məsələləri Dövlət Komitəsinin Elektron Xidmətlər Portalında (e-emdk.gov.az) 39-cu elektron xidmət olan “Daşınmaz dövlət əmlakının qeydiyyat vərəqəsinin elektron qəbulu” bölməsinə daxil olunur. Hesabatı təqdim edən hər bir dövlət müəssisəsi üçün müəyyən edilmiş kod və şifrəni yazmaqla sistemə daxil olmaq mümkündür. Bundan sonra həmin dövlət müəssisələri haqqında ümumi məlumatlar (müəssisənin balansında olan, yeni qəbul edilmiş, balansdan çıxarılmış, istifadədə olan, lakin balansda olmayan əmlaklar) ekranda göstərilir. Hazırlanan hesabat elektron formada komitəyə göndərilir və «Bildiriş» düyməsini sıxmaqla hesabatın təqdim edilməsini təsdiq edən bildiriş əldə olunur. Komitəyə göndərilən hesabat araşdırıldıqdan sonra müvafiq ərazi idarələrinə göndərilir. Regional qurumlarda araşdırılıb və yerində yoxlandıqdan sonra uyğun hesabatlar Registr bazasına elektron qaydada yazılır.
