İndoneziyada itən qadının nəşi pitonun qarnından tapıldı
İndoneziyada yoxa çıxan qadının cəsədi 5 metrlik pitonun qarnından çıxarılıb.
Yerli mətbuatın məlumatına görə, Cənubi Sulavesi bölgəsindəki Kalempanq kəndində 45 yaşlı qadın iyunun 6-da bibər satmaq üçün yola düşüb.
Qadın evə qayıtmayınca yaxınları və kənd sakinləri axtarışa başlayıblar. Kənd sakinləri kəndin ətrafındakı meşədə qadının əşyalarının yanında təxminən 5 metr uzunluğunda piton tapıblar.
Qismən şişmiş pitonun qadını udmuş ola biləcəyindən şübhələnən kənd sakinləri ilanı öldürüblər.
Parçalanmış pitonun qarnından 45 yaşlı qadının cəsədi çıxarılıb.
Qeyd edək ki, bu, Sulavesidə baş verən ilk belə hal deyil. Belə ki, 2017-ci ildə bölgədə yoxa çıxan şəxs 2 gün sonra 7 metrlik pitonun qarnından çıxarılmışdı.
