Şimali koreyalı hakerlər dünya üzrə şirkətlərdən məxfi məlumatları oğurlamaqda ittiham olunurlar
ABŞ, Böyük Britaniya və Cənubi Koreya Şimali Koreyalı hakerlərin həssas hərbi məlumatları oğurlamaq məqsədilə dünyanın müxtəlif yerlərində müxtəlif müdafiə və mühəndislik firmalarının kompüter sistemlərini hədəfə aldığını açıqlayıb.
ABŞ Milli Təhlükəsizlik Agentliyi (NSA), Böyük Britaniya Milli Kibertəhlükəsizlik Mərkəzi (NCSC) və Cənubi Koreya Milli Kəşfiyyat Xidməti (NIS) məsələ ilə bağlı birgə bəyanat yayıb.
Bəyanatda Şimali Koreyanın dəstəklədiyi “Anadriel" və ya "APT45” adlı hakerlərin tank, sualtı qayıq, döyüş təyyarəsi, raket və radar sistemləri istehsalçıları da daxil olmaqla müxtəlif müdafiə və mühəndislik şirkətlərinin kompüter sistemlərini hədəfə aldığı bildirilib.
Açıqlamada hakerlərin Yaponiya və Hindistanda da müxtəlif sənaye sektorlarını hədəf aldıqları və "Andarielin" ABŞ-da yerləşən bəzi səhiyyə təşkilatlarına qarşı fidyə proqramı əməliyyatları ilə casusluq fəaliyyətini maliyyələşdirdiyi ifadə edilib.
ABŞ Ədliyyə Departamenti həmçinin "Anadriel" üzvü Şimali Koreyadan olan Rim Jong-Hyoka qarşı ittiham aktı dərc edərək, onun ABŞ-da yerləşən xəstəxanalardakı proqram təminatını sındırdığını və oradan əldə etdiyi fidyə gəlirləri ilə bütün dünyada dövlət qurumları üçün hakerlik fəaliyyəti təmin etdiyini iddia edib.
İddianamədə Rim və digər şimali koreyalı hakerlərin ABŞ Hərbi Hava Qüvvələrinin 2 bazasına, NASA-ya, eləcə də Tayvan, Cənubi Koreya və Çindəki bəzi təşkilatlara qarşı haker əməliyyatları həyata keçirdiyi qeyd edilib.
ABŞ Dövlət Departamenti həmçinin "Anadriel" üzvü Rim-in yeri və ya şəxsiyyəti barədə məlumat verənə 10 milyon dollara qədər mükafat təklif etdiyini açıqlayıb.
Qeyd edək ki, Birləşmiş Millətlər Təşkilatının (BMT) 2023-cü ilin əvvəlində verdiyi açıqlamada Şimali Koreyanın 2022-ci ildə əvvəlki ilə nisbətən daha çox rəqəmsal pul oğurladığını açıqlayıb.
Beynəlxalq müşahidəçilər bildirirlər ki, oğurlanan bu pullar Şimali Koreyanın sanksiyalara məruz qalan nüvə və raket proqramlarına köçürülüb.
