Haiti həbsxanasından qaçan 12 məhbus ölüb
Haitinin Sen-Mark şəhərində həbsxanadan qaçış nəticəsində 12 məhbus həlak olub.
AFN.az "Reuters"ə istinadən xəbər verir ki, bunu şəhərin meri Myriam Fièvre bildirib. Bu, quldurluğun səbəb olduğu uzun sürən humanitar böhran fonunda son aylarda Haitidə baş verən üçüncü belə hadisədir. Dövlət ittihamçısı Venson Françis, təxminən 540 məhbusun saxlanıldığı həbsxanada cümə günü günortadan sonra vəziyyətin nəzarət altında olduğunu söyləyib. Həmçinin qeyd edib ki, buna baxmayaraq, ictimaiyyət ayıq-sayıq olmalıdır.
“Vəziyyət nəzarət altındadır, lakin nəticələr fəlakətlidir. Bütün polis yataqxanaları yanıb kül oldu. Arxivlər yanıb kül oldu. Onlar kameralarından başqa hər şeyi yandırıblar”, - deyə Françis bildirib.
Yerli hökumət sözçüsü Valter Montas bildirib ki, hadisə məhbusların yeməksiz qalması və dəhşətli sağlamlıq vəziyyəti ilə üzləşməsi səbəbindən baş verən kortəbii etirazın nəticəsidir.
