Donald Trampa sui-qəsdə cəhd edən şəxsin cəsədi yandırılıb
![](/uploads/posts/2024-08/tramp-kruks.png)
ABŞ konqresmeni Kley Higgins bildirib ki, Federal Təhqiqatlar Bürosunun (FTB) keçmiş prezident Donald Trampa sui-qəsd cəhdi edən Tomas Metyu Kruksun cəsədini ailəsinə təhvil verməsi və hadisədən bir neçə gün sonra kremasiya etməsi görünməmiş hadisədir.
“New York Post” qəzetinin yazdığına görə, ABŞ konqresmeni Kley Higgins sui-qəsd cəhdi ilə bağlı apardığı araşdırma zamanı Kruksun cəsədinin ailəsinə təhvil verildiyini və yandırıldığını öyrəndiyini və istintaqın gedişatına mane olan bu qərarın narahatedici olduğunu bildirib.
Trampa qarşı sui-qəsd cəhdi zamanı təhlükəsizlik zəifliklərini araşdırmaq üçün yaradılan “13 İyul İş Qrupu” komitəsinə təqdim etdiyi hesabatda Higgins, Kruksun cəsədinin yandırıldığını hadisədən 10 gün sonra öyrəndiyini bildirib.
FTB-nin cinayət yerindən bioloji dəlilləri çıxardığını ifadə edən Higgins, bunun görünməmiş bir hadisə olduğunu vurğulayıb.
FTB-nin Konqresin hadisəni araşdıracağını bildiyini qeyd edən Higgins, FTB-nin dünyanın qalan hissəsi ilə əlaqəsinin kəsilmədiyini deyib.
Yarılma nəticələrinin düzgünlüyünü təsdiqləmək istədiyini qeyd edən Higgins cəsədin yandırılması ilə bağlı bunları deyib: “Bəli, hesabatları və şəkilləri görəcəyik, amma bu hesabatların və şəkillərin doğru olduğunu heç vaxt dəqiq deyə bilməyəcəm”.
Kruksun cəsədinin 5 avqusta qədər yandırıldığının bilinmədiyinə diqqət çəkən Higgins, FTB-nin hərəkətlərini istintaqların gedişinə mane olmaq olaraq xarakterizə edib.
Higgins bildirib ki, onların araşdırması müəyyən edib ki, Kruks yerdən və ya ABŞ Gizli Xidmətinin snayper qruplarından cavab atəşi təhlükəsini minimuma endirmək üçün özünü damda mükəmməl şəkildə yerləşdirib.
ABŞ Konqresmen Higgins, bir SWAT agentinin təxminən 300 fut məsafədən atəş açaraq Kruksun silahının tampon borusuna zərər verdiyini və 10-cu və son güllənin Kruksun ağzının sol tərəfindən girərək sağ qulağından çıxdığını təyin etdiyini açıqlayıb.
Digər tərəfdən, FTB Pittsburgh ofisi Higginsin ittihamlarına cavab olaraq bir açıqlama verib.
“FTB-nin Pensilvaniya ştatının Butler qraflığında sui-qəsd cəhdini araşdırmaq üçün Konqresin səylərinə müdaxilə etdiyinə dair iddialar yalan və əsassızdır”, - deyə bəyanatda bildirilib.
Açıqlamada qeyd edilib ki, hadisə yeri və sübutlarla rəftarda normal prosedurlara əməl edilib, hadisə yeri mərhələli şəkildə mülkiyyətçilərə təhvil verilib, hər bir fəaliyyət və sübut istintaq çərçivəsində sənədləşdirilib, Kruksun cəsədinin ailəsinə çatdırılmasının adi prosedurun bir hissəsi olduğu vurğulanıb.
Mənbə: AA