ABŞ Konqresində UFO dinləməsi keçiriləcək
ABŞ Konqresi bu həftə UFO-larla bağlı yeni dinləmə keçirəcək. “Naməlum anomal hadisələr: Həqiqətin üzə çıxarılması” adlı sessiya 13 noyabrda Vaşinqtonda Rayburn House ofisinin binasında baş tutacaq.
Bu dinləmə ABŞ hökumətinin gizli UFO tədqiqat proqramlarının təfərrüatlarını ictimaiyyətə açıqlamaq səylərinin bir hissəsi kimi keçirilir.
Sessiyaya nümayəndələr Nensi Meys və Qlen Qrotman sədrlik edəcək.
Açıqlamada Meys və Qrotman "Amerika xalqı federal hökumətin məlumat paylaşmağa olan gizli münasibətindən yorulub. İctimaiyyətin hökumətin UFO müşahidələri və bu hadisələrin yarada biləcəyi potensial təhlükələr haqqında nə öyrəndiyini bilmək hüququ var" deyib.
Dinləmələrdə keçmiş kəşfiyyatçı Luis Elizondo, ABŞ Hərbi Dəniz Qüvvələrinin təqaüdçü admiralı Tim Qalaudet və NASA-nın keçmiş Kosmik Siyasət Məsləhətçisi Maykl Qold da daxil olmaqla ekspert şahidləri dinləniləcək.
Elizondo iddia edir ki, ABŞ hökuməti UFO-lar haqqında məlumatları gizlədir. Qalaudet isə naməlum sualtı obyektlərin ABŞ-ın dəniz təhlükəsizliyini təhdid etdiyini müdafiə edir.
NASA-nın UAP (Unidentified Aerial Phenomenon) araşdırmaları ilə bağlı NASA prezidenti Bill Nelson 2024-cü ilin sentyabrında etdiyi şərhdə, "Müəyyən edilməmiş hava hadisələrinin yerdən kənar mənşəli olduğuna dair heç bir sübut yoxdur, lakin bu mövzuda öyrənməli çox şey var" qeyd edib.
Sessiya ABŞ Müdafiə Nazirliyinin UFO-larla bağlı məxfilik siyasətini sorğulayacaq, eyni zamanda ictimaiyyəti daha çox məlumatlandırmaq üçün şəffaflığın təmin edilməsi yollarını müzakirə edəcək.
Mənbə: Space
