BMT: 7 ayda 400 min yeni ukraynalı qaçqın Avropaya keçib
Birləşmiş Millətlər Təşkilatının (BMT) Qaçqınlar üzrə Ali Komissarının müavini Keli Klements davam edən Rusiya-Ukrayna müharibəsi səbəbiylə 2024-cü ilin əvvəlindən avqust ayına qədər 400 min yeni ukraynalı qaçqının müharibədən və bombalardan qaçmaq üçün Avropaya keçdiyini söyləyib.
Klements BMT-nin Cenevrə ofisinin həftəlik mətbuat konfransında qiymətləndirmələr edib.
Rusiya ilə Ukrayna arasında müharibənin 2022-ci ilin fevralında başladığını xatırladan Klements, intensiv hücumlar və çətin qış mövsümünün başlaması ilə mülki əhalinin ehtiyaclarının artdığını vurğulayıb.
Klements Rusiyanın Ukraynada enerji infrastrukturunu məhv etməsi son aylarda enerji istehsal gücünün yüzdə 65-nin itirilməsinə səbəb olduğunu, elektrik, istilik və su təchizatını pozan hücumların davam etdiyini vurğulayıb.
Avqust ayından bəri ölkənin şərqində təxminən 170 min insanın evlərini tərk etmək məcburiyyətində qaldığını deyən Klements, onların əksəriyyətinin qarşıdurmaların baş verdiyi bölgələrdən təxliyə edildiyini qeyd edib.
Təxminən 4 milyon insanın Ukrayna daxilində didərgin düşdüyünü, 6,7 milyon insanın isə ölkə xaricinə sığındığını ifadə edən Klements, 2024-cü ilin əvvəlindən avqust ayına qədər 400 min yeni ukraynalı qaçqının müharibədən və bombalardan qorunmaq üçün Avropaya keçdiyini də bildirib.
Klements qeyd edib ki, Ukraynada bir çox uşaq təhsillərini onlayn davam etdirir və sosial qarşılıqlı əlaqə və sinif təcrübəsindən məhrumdur.
Klements həmçinin Xarkov kimi bölgələrdə uşaqların hava hücumlarından xilas olmaq üçün yeraltı sığınacaqlarda təhsil aldığını ifadə edərək, bu ərazilərdə təbii işıq və oyun meydançalarının olmadığına diqqət çəkib.
Mənbə: AA
